![]() |
Dä Artikel behandlet s Dorf Maloja im schwiizerische Kanton Graubünde; für anderi Bedütigen lueg Maloja (Begriffsklärung) |
Maloja (rätoromanisch , italiänisch Maloggia) isch e Dorf am Malojabass zwüschen em Oberengadin und em Bergell im schwiizerische Kanton Graubünde.
S Dorf ghört bolitisch zur Gmeind Bregaglia im Bergell (Bezirk Maloja), geografisch aber zum Oberengadin. Dr Ort het öbbe 300 Iiwohner und füehrt en eigeni Brimarschuel, wo sit churzem dr Underricht zweisproochig (Italiänisch und Dütsch) abghalte wird.
D Gegend um Maloja isch geografisch, geologisch und botanisch eins vo de intressantiste Gebiet in de Alpe. Vo Nordoste her het s e Chetti vo Seä in dr Engadiner Hochebeni, wo s hochi Bärg zringsumme het, bis zum Bassort Maloja uf ere Höchi vo 1'815 m ü. M. Diräkt am Dorfrand vo Maloja lit dr südlichsti vo dene Seä, dr Silsersee. Dr Inn, wo in Maloja si Quelle het, git em Engadin si Name (us En, dr Fluss, + gadin, s Daal / d Iifriidig). Am Südusgang vom Ort goht d Strooss über e Malojabass und denn stotzig aabe ins Bergell, e Südwestdaal, wo d Strooss noch öbbe 30 Kilometer in s italiänische Stedtli Chiavenna füert, wo nume no 300 m hoch liit.
Vo Italie här fahrt mä über Chiavenna dur s Bergell dr Malojapass uufe, do verchehrt regelmässig au s Bostauti. Vo Nordoste här cha mä mit dr Rhätische Bahn bis St. Moritz fahre und denn mit em Bostauti bis Maloja. Mit em Auti cha mä vo Norde über e Julierpass via Silvaplana fahre.
Koordinate: 46° 24′ N, 9° 42′ O; CH1903: 773574 / 141401