S Lexicon istoric retic, abgchürz LIR, isch es Sachwörterbuech vo dr Bündner Gschicht.
Me het s als Spezialauusgab vom gsamtschwiizerische Historische Lexikon HLS gmacht, zum näbe däm syne drüü Versioone i de grössere Landessprooche vo der Schwiiz au wengischtens e Teil i dr vierte Landessprooch, em Rätormanische, usezgää. S Lexikon het zwee Bänd, es isch bim Desertina Verlag z Chur usecho. Dr Kanton Graubünden und d Pro Helvetia händ ghulfe d Chöschte zaale.
Der Name würd is Dütschen übertreit heisse: «Rätischs Historischs Lexikon».
Me het füre Inhalt vom Lexikon die nöi bündnerromanische Tachsprooch Rumantsch Grischun gwählt und nid öppis vo de regionale Dialäkt vom Bündnerromanische. D Lia Rumantscha hilft bi der sproochliche Arbet vo dr Redakzioon.
S LIR het meh weder drüütuusig Artikle über Ortschafte, s Lääbe vo bekante Lüüt und Familene us em drüüsproochige Bündnerland und au divärsi Sachartikel zum chly wytere räätische Ruum. Es git zimli vill Bytreeg, wo numen im LIR und nit au im HLS vorchöme.
Sid em Joor 2004 isch s elektronische «e-LIR» ufgschaltet, wo men em Wörterbuech syni Artikel über s Internet cha go lääse und kopiere.