Lag baOmer (ל"ג בעומר aschkenasisch) oder Lag laOmer (sephardisch) isch e jüüdischs Fest. Es isch e Halbfiirdig, wo am 33. Daag vom Omer-Zele zwüsche Pessach und Schawuot begange wird und uf e 18. Ijjar fallt. Lag (hebräisch ל"ג) stoot do für 33.
Dr Ursprung vom Fest goot uf e Bar-Kochba-Ufstand gege d Römer 132 bis 135 noch dr Zitwändi zrugg. Es isch au e Fest zur Erinnerig an dr Rabbi Schimon ben Jochai, wo noch dr Überliiferig an däm Daag gstorbe isch (vo doo chunnt d Bezäichnig Hillula de Raschbi). Z Meron in Galiläa, nid wit vo Zfat, bsueche jedes Joor am Lag baOmer Zääduusigi vo Lüt im Rabbi si Graab und s Graab vom Elasar ben Schimon.
Lag baOmer isch e frööligs Fest. Die verschiidene iischränkende Gebot vo dr Druurzit, wo für die 49 Omer-Dääg zwüsche Pessach und Schawuot gälte, si an däm Daag ufghoobe. Chinder und Erwaggseni veraastalte Picknick und versammle sich um Lagerfüür. Vor allem cha mä an däm Daag hüroote. Mä darf sich wider rasiere und sich d Hoor lo schniide. Am Lag baOmer git s dorum au d Zeremonii vo dr Chalaka.
Der 33. Omer-Daag isch au d Nacht vo de vile Fackle. Die gröössti wird über em Graab vom Raschbi z Meron in Obergaliläa aazündet. Dr wichdigsti Grund, wiso die Fackle aazündet wärde, isch ass dr Raschbi as dr Hauptverfasser vom Buech vo dr Kabbala gältet, em so genannte "Sohar".
D Chinder "bewaffne" sich mit Pfiil und Booge und gönge uf d Fälder und in d Wälder. Dä Bruuch erinneret an d Kämpfer im Bar-Kochba-Ufstand, aber au an dr Räägebooge as Zäiche vom Bund, "wo dr Herr mit em Volk Israel gschlosse het", zum em zäige, ass er d Wält nid no äinisch, it ere Sintfluet wurd bestroofe wie zur Zit vom Noah.
Wäärend em Ufstand vom Bar Kochba, em "Soon vom Stärn", wo under em Käiser Hadrian brobiert het, s römische Joch abzschüttle (132-135) isch d Festig Betar im Zentrum vom Kampf gsi. Noch dr Überliiferig het an däm Daag d Epidemii ufghöört, won e Hufe vo de Schüeler vom Rabbi Akiba umbrocht het. Dr Rabbi Akiba ben Josef wo dr Ufstand understützt het, isch schliesslig as Märtürer gstorbe.
Au dr Rabbi Schimon ben Jochai het gege d Römer kämpft. Er isch z Meron (bi Zfat) begraabe, und bis hüte chömme am Lag ba-Omer Lüt zu sim Graab, denn dr 33. Omer-Daag isch au dr Doodesdag vom Raschbi, em Rabbi Simeon bar Jochai, eme berüemte Tannait vo dr vierte Generazioon. Noch dr Überliiferig isch er an sim Doodesdaag diräkt in Himmel gfaare, und dorum bezäichnet mä s Fest zu sine Eere as "Hillula de Raschbi", as Fröidefest vom Zaddik (Grächte). Es git Massefröidefest mit Lieder, Danz und Gebät.
![]() |
Dä Artikel basiert uff ere fräie Übersetzig vum Artikel „Lag_BaOmer“ vu de dütsche Wikipedia. E Liste vu de Autore un Versione isch do z finde. |