Konjunktione sin e Undergruppe vo de Partikle und ghöre dodemit zu de únflektierbare (= únveränderliche) Wörter. Sí verbinde Deilsätz, Einzelwörter, Satzglyder oder Deilwörter mitenand:
- Verbindig vo Deilsätz: Er hät vyl Gæld und síni Frau liebt en.
- Verbindig vo Einzelwörter: ich und du
- Verbindig vo Satzglyder: Ich kumm heim und iss z Nacht.
- Verbindig vo Deilwörter: A- und Verkauf
Anstell vom "und" in sælle vier Funktione ka au e anderi Konjunktion stoh, z. B. odder, aber, denn, ...
Mer ka Präpositione noch Gebruch in verschydeni Klasse ydeile.
- Næbeordnendi Konjunktione
Sí verbinde zwei Hauptsätz, zwei Næbesätz oder zwei Satzglyder mitenand.
Bíspyl: und, oder, aber
- Underordnendi Konjunktione
Sælli Konjunktione verbinde e Hauptsatz mit me Næbesatz.
Bíspyl: während, wyl, dass, nochdèm, ob
- Mehrdeiligi Konjunktione
Sí sin im Alemannische sæltener in Gebruch wie im Hochdytsche. De erscht Deil stoht vor de erschte Elemænt, wo verbunde wird, de zweit zwüsche de Beide.
Bíspyl: weder - no, entweder - odder, nit numme - sondern au
- Infinitivkonjunktione
Uff d Infinitivkonjunktione folgt immer e Verb im Infinitiv (Grundform). Abhängig vom Dialækt, oft au vo de Konjunktion, wird im Alemannische e "z" vor s Verb bzw. hinder d Vorsilbe ygfiegt, oder s wird e zum vor s Verb gstellt:
Myr fahre uff Konschtanz zum öbber bsüeche / um öbber z bsüeche.
Aber:
Myr fahre uff Konschtanz, anstatt öbber z bsüeche (nit: anstatt zum ...)
Bíspyl: um z/zum, anstatt z
- Satzdeilkonjunktione
Dodezüe ghöre numme d Konjunktione als und wie. Oft wird e Verglych dargstellt:
Öbber wie ich
Ich lüeg des als Beleidigung a.
Mer ka Konjunktione aber au noch de Bedytig ydeile. Deno ergænn sich dí folgende Gruppe:
- additiv
S wird e Areihig oder Uffzällig úßdruckt.
Bíspyl: weder - no, und
- adversativ
Sælli Konjunktione drucke e Gegesatz úß.
Bíspyl: aber, allerdings
- disjunktiv
Mithilf vo denne Konjunktione wird úßdruckt, dass es zwei Mögligkeite git.
Bíspyl: entweder - odder, nit numme - sondern au
- explikativ
S wird e Erklärig aghänkt.
Bíspyl: des heißt
- kausal
Dí kausale Konjunktione drucke e Grund úß.
Bíspyl: denn, wyl, sodass
- konzessiv
Mit denne Konjunktione macht mer e Yrumig.
Bíspyl: obwohl, wenn au
- komparativ
Mer druckt e Verglych úß. Dodezüe ghört numme d Konjunktion wie.
- 'lokal
D Konjunktion bezieht sich uff de Ort.
Bíspyl: wo, wo - her
- modal
Sælli Wörter drucke Umständ, Mittel und Art und Wís úß.
Bíspyl: wie wenn (hochdt. als ob), indèm, als, wie
- temporal
S wird d Zít zum Úßdruck brocht.
Bíspyl: während, wo, bis
Alemannische Satzbau, Relativsatz