| Joe "King" Oliver | |
|---|---|
 | |
| Date | |
| Geburtsname | Joseph Nathan Oliver |
| Uf d Wält cho | 19. Dezämber 1881 z Aben, Louisiana, USA |
| Gstorbe | 10. April 1938 z Savannah, Georgia, USA |
| Genre | Dschääs, Dixieland |
| Beschäftigung | Bändliider |
| Instrument | Kornett |
| Aktiv | 1908-1937 |
| Het gspiilt mit | Louis Armstrong Johnny Dodds Lawrence Duhé |
Dr Joe "King" Oliver (* 19. Dezämber 1881 z Aben, Louisiana, USA as Joseph Nathan Oliver; † 10. April 1938 z Savannah, Georgia, USA) isch en amerikanische Dschääskornettspiiler und Bändliider gsi. Er isch drfür bekannt gsi, wien er gspiilt het, und vor allem as Pionier vom Dämpfer im Dschääs. Er isch e wichdige Komponist gsi und het e Hufe Melodie gschriibe, wo au hüte no gspiilt wärde, wie "Dippermouth Blues," "Sweet Like This," "Canal Street Blues" und "Doctor Jazz." Er isch dr Mentor und Leerer vom Louis Armstrong gsi. Si Iifluss isch eso grooss gsi, ass dr Armstrong gsäit het, ass ooni dr Joe Oliver, dr Dschääs nid wer, was er hüte isch.[1]
Vo 1923 bis 1931 het dr Oliver Blatte ufgnoo, mit sinere Creole Jazz Band (1923), mit em Jelly Roll Morton (1924), mit de Butterbeans and Susie (1924), mit de Dixie Syncopators (1926), mit em Clarence Williams (1928) und denn bis 1931 mit Studiobänds bi Victor.
Wäärend dr Wältwirtschaftskrise isch s äng worde für en Oliver. Er isch uf Duur gange, und si Bänd isch schliesslig 1937 in Savannah, Georgia, stegge bliibe und usenandergheit. Wäge sinere Arteriosklerose het er nüme chönne spiile und isch bald druf vollkomme verarmt an ere Hirnbluetig gstorbe. D Negro Actors Guild het schliesslig für sis Begräbnis zaalt und an dr Abdankig het dr Louis Armstrong e Solo gspiilt. Dr Joe King Oliver isch uf em Woodlawn Cemetery in dr Bronx z Nöi York begraabe.