Chärns | |
---|---|
Basisdate | |
Staat: | Schwiiz |
Kanton: | Obwalde (OW) |
Bezirk: | (Dr Kanton Obwaldä kännt käi Bezirk.) |
BFS-Nr.: | 1404 |
Poschtleitzahl: | 6064 Kerns 6066 St. Niklausen 6067 Melchtal 6068 Melchsee-Frutt |
UN/LOCODE: | CH KER |
Koordinate: | 663831 / 194969 |
Höchi: | 564 m ü. M. |
Flächi: | 92,66 km² |
Iiwohner: | 6424 (31. Dezämber 2022)[1] |
Website: | www.kerns.ch |
Charte | |
Chärns (schriftdiitsch Kerns) isch ä Gmäind im Kanton Obwaldä.
Chärns isch flächemäässig diä greescht Gmäind z Obwaldä. Nachbergmäinde sind (dr Oorfiigä naa) Alpnach, Sarnä, Sachslä, Lungrä, Haslibäärg, Innertkirche, Wolfeschiässe, Dalewiil und Ännemmos. Uf Dalewil ibere gaat der Ächerlipass.
D Gmäind beschtaad us em äigetlichä Dorf und us verschidene Wiiler und Sidligä. Uifzellä chamä hiä bsunders dr Sand, aber ai Samiglaisä, ds Melchtel und p Frutt.
Äs gid nu käi Diitig vom Namä Chärns, wo wirklich uberziigd.[2] S Wappä vo Chärns zäigt drii goldigi Chorngarbe uf blawem Grund. Das Wappe isch um d Mitti vom 18. Jaarhundert entschtandä und cha als «redends Wappe» agluägt wärdä.[3]
Ds Fraiweschimmrächt hed d Gmäind Chärns (uf Gmäindsäbeni) erscht am 30. Novämber 1980 igfiärd – ganz im Gägäsatz zur katolischä Chilägmäind, wo 1969 im Kantoon ä Vorriiterrollä ubernu hed.[4][5] Vilicht hed dä koservatiivi Zug vo de ländlich präägte Chärnser drzuä gfiärd, ass diä anderä im Kantoon immer ai ächlii uber sii gschpettled hend. So hed i dä 1970er Jaar p Fraag «Chuisch vo Chärns?» under jungä Liit eppä gmäind «Läbsch nu hinderem Moond?» oder gar «Schpinnsch?»