As Kastrate het män e Sänger bezäichnet, wo vor dr Puberdäät kastriert worde isch, für dass si nid in Stimmwäggsel chömme und iiri hoochi Buebestimm (Sopran oder Alt) chönne bhalte. Eso het dr jungi Mensch d Gröössi vom ene Erwaggsene überchoo, het aber die hoochi Stimm bhalte und het mit ere so chreftig chönne singe wie e Maa.
Sit dr Spootantike het mä vor allem z Italie e Hufe Buebe kastriert, so dass si Sänger häi chönne wärde. Vili von ene häi d Operazioon nid überläbt, wil s immer wider Komplikazioone gee het.[1] Anderi häi ganz äifach käi Talänt zum Singe gha und nume ganz weenigi si erfolgriich gsi, die häi aber s Publikum mit iire „überirdische Stimme“ chönne begäistere.
Wäge dr Kastrazioon si nid nume d Stimmbänder chlii bliibe, s wichtig Hormon Testosteron, wo vo de Hoode bildet wird, het gfäält, d Entwicklig vo de sekundäre Gschlächtsmerkmool isch gstöört gsi und d Kastrate si vilmol zu Riise gwaggse wo denn mit em Alter vilmol au dick worde si.
Im Brinzip chönne d Kastrate aber en Erekzioon überchoo. Dorum het s au Daame gee, wo finanziell besser gstellt gsi si und d Kastrate usgnützt häi, zum iiri sexuelle Wünsch z erfülle, ooni dass si müesste Angst haa, schwanger z wärde.[1]
D Kastrate si im öiropäische Muusiglääbe bis ins 17. und 18. Joorhundert beliebt gsi. Zu de berüemtiste Kastrate us deere Zit ghööre dr Senesino, dr Farinelli, dr Caffarelli und dr Antonio Bernacchi, wo vor allem in dr Opere zu Staar worde si. Im 19. Joorhundert het mä mit em Kastriere ufghöört. Das macht Brobleem wemm mä Alti Muusig will üffüere, wil d Stimme vo Fraue und Countertenör, wo die richdigi Stimmlaag hätte, ganz andersch dööne als d Stimme vo Kastrate.
![]() |
Dä Artikel basiert uff ere fräie Übersetzig vum Artikel „Kastrat“ vu de dütsche Wikipedia. E Liste vu de Autore un Versione isch do z finde. |