Skardhamúla (Maniotisch: Σκαραμαμούλα, älter: ʼσ Καρδαμοῦλα), amtlich Kardhamíli (noigriech. Καρδαμύλη) isch en Ort uf de Halbinsle Mani uf de Peloponnes z Griecheland im Nomos Messini.
Skardamula litt imene fruchtbare Tal am Meer zue und het e guete natürliche Hafe. Nördlich vom Ort litt di mittelalterlichi Festi Varussi (Βαρούσια), wo im 12. Joorhundert baut woren isch.
Di antiki Akropolis lit ufeme staile Fels öppe zwee Kilometer vom Meer ewegg und 800 Meter nördlich vom moderne Ort. Uf dem Hügel stoot d Cherche Ajia Sofia usem früene 17. Joorhundert. Us de antiki sind nume wenige Muure und Öberrest erhalte.
Öppe 200 Meter vo de antike Akropolis ewegg isch en antiks Doppelchammeregraab, wo in Fels ineghaue woren isch und wo vo die Iihaimische »Grab vo de Dioskure« (τάφοι Διοσκούρων táfi Dhioskúron) gnennt werd, nöd wiit ewegg dodevo isch no e dritts Graab.
D Altstadt vo Skardamula litt underhalb vo de Akropolis, me gege s Meer hii. Si bistoot us Hüser imene Mischstil us venezianische und maniotische Eliment, Woon- und Weertürn. D Cherche Ajios Spiridon isch i de erst Hälfti vom 18. Joorhundert vom Panagotis Trupakis baut wore. De isch de Vatter vom Michalis Trupakis, wo vo 1773 bis 1784 de Bey vo de Mani gsii isch.
I de Mitti vom 19. Joorhundert isch den de Ort zo de Chüste hii verlait wore. De Hafe litt im süüdlich vom Ort und uf de natüürliche Moole stoot s Chappeli Ai-Janis und s alti Zollhuus. Hinderem Hafe litt d Insle Meropi mit Reste vonere venezianische Festig.
Zerstmool gnennt werds i de Ilias vom Homer, wo d Stadt Kardamyle (altgriech. Καρδαμύλη) zo de sibe Städt ghört, wo de Nestor em Agamemnon versprecht.
D Geged vo Skardamula isch sit em Neolithikum kontinuierlich bisidlet. Di mykenischi Sidlig und di früeantiki Akropolis sind ufeme staile felsige Hügel, öppe zwee Kilometer vom Meer ewegg, gstande und 800 Meter nördlich vom hüttige Ort. I de Hellenistische Zitt isch de Ort as Meer ane verlait wore. Nebe vill Keramik sind ono Reste vo de antike Stadtmuur erhalte und e paar Inschrifte.
I de früene Antiki ischs e Periökestadt vo Sparta gsii und sitt ane 146 v. Chr. hets zom Bund vo de Eleutherolakone ghört. De Chaiser Augustus hets denn wider zu Sparta gschlage.
De Pausanias het de Ort bsuecht und bischribe. Denoo hets im Ort e Tempel för de Apollon Karneios ggee und ann för d Athena und am Strand isch e Hailigtum vo de Nereide gsii.