Dr Kaddisch (aramäisch: häilig bzw. Häiligung) isch äins vo de wichdigste Gebät im Juudedum. Es isch e Häiligungsgebät und het sich in de noochchristlige Joorhundert uusebildet. S ursprünglige Gebät isch erwiiteret worde und si liturgischi Gebruuch het sich im Lauf vo de Joorhundert veränderet. Die eltiste Rezensione, wo mä no cha finde, si Geniza-Fragmänt, wo mä käim bestimmte Wärk cha zueordne. E Versioon vom Gebät im ene Siddur vom Amram Gaon (um 900) basiert uf ere aschkenasische Rezensioon, wo käinere vo de eltere Fassige entspricht. Im Geegesatz zu fast alle andere jüüdische Gebät isch si Sprooch nit nume Hebräisch, sondern au Aramäisch.
Es git sonigi wo sääge, ass dr Kaddisch zäämol am Daag sött gsäit wärde. Au bi de Daagesgebät het er si Blatz und im Gottesdienst, won er d Übergäng zwüsche de wichdigste Abschnitt markiert. Mä säit en au uf mit chliine Ändrige zum Gedänke an Verstorbeni und am Graab. Wenn öbber in dr ängere Familie stirbt, säit en dr nöggst männlig Verwandti elf Mönet lang jede Daag uf. Am Jooresdaag vom Doodesfall säit män en denn no äinisch und das isch s Ändi vo dere Form vo dr ritualisierte Druur.
Die wichdigste Gedanke vom Kaddisch findet mä au im Vaterunser, wo vo dr chtistlige Dradizioon im Jesus vo Nazareth zuegschriibe wird.
![]() |
Dä Artikel basiert uff ere fräie Übersetzig vum Artikel „Kaddisch“ vu de dütsche Wikipedia. E Liste vu de Autore un Versione isch do z finde. |