Immisee | ||
---|---|---|
![]() | ||
Basisdate | ||
Staat: | Schwiiz | |
Kanton: | Schwyz (SZ) | |
Bezirk: | Küssnacht | |
Gmeind: | Küssnacht SZ | |
Poschtleitzahl: | 6405 | |
Koordinate: | 677834 / 216754 | |
Höchi: | 416 m ü. M. | |
Iiwohner: | 2427 (31. Dezember 2013) | |
Website: | www.kuessnacht.ch | |
![]() Immensee | ||
Charte | ||
Immisee isch en Ortschaft, wo zum Bezirk Chüsnacht im Schwiizer Kanton Schwyz ghört. Under em Titel «Immensee» gits au e Nowälle vom dütsche Schriftsteller Theodor Storm, wo aber nüüt mit dem Ort z tue het.
S Dorf Immisee liit ybettet zwüsched de Rigi-Nordflangge und de Halbinsle Chieme anere Bucht vom Zugersee uf ere Höchi vo 416 m ü. M.
Immisee isch zum erste Mal im Jahr 1048 als Imisee erwähnt worde, 1260 denn als lacus Ymmois. De Name stammt vom Ritter Immo vo Buonas, wo hie am Zugersee s Fischeryyrächt bsässe het. Berüehmt worden isch au di Hohli Gass, wo s Dorf mit Chüsnacht verbindet. I de Hohle Gass söll luut Saag im Jahr 1307 d Ermordig vom Landvogt Hermann Gessler dur de Wilhälm Täll stattgfunde ha. 1638 isch a dere Stell es Heilig Hüsli buut worde, hüt bekannt als Tällskapälle.
1729 isch d Kaplany Immisee gründet worde. Bim Franzosenyfall 1798 hend z Immisee Kämpfe gäge d Franzose stattgfunde und 20 Iiwohner sind deby gfalle. 1847 hets au no Scharmützel im Sonderbundschrieg gä.
Vo de Verchehrsentwicklig isch de Durchfahrtsort Immisee bsunders betroffe gsi. 1852 isch s erste Dampfschiff uf em Zugersee verchehrt. 30 Jahr spöter, 1882, isch die Gottertverbindig zu de Aargauische Südbahn i de Station Immisee verwirklicht worde. Bis 1937 isch de Autoverchehr no dur di Hohli Gass grollt, sythär isch die Sehenswürdigkeit im Bsitz vo de Schwiizer Schueljuged dur ne Umfahrigsstrass entlastet.
Berüehmt isch au s Missionshuus Bethlehem und s Gymnasium vo Immisee. 1896 het de savoyische Priester Pierre Barral s Missionshaus Bethlehem gründet. Ab de 1920er Jahr het d Missionsgsellschaft vo det uus katholischi Missionar uf Afrika, Asie und Latiinamerika entsändet.