S Hanny Christen (* 3. Augschte 1899 z Lieschtel; † 29. Juni 1976 z Basel; eigentli Johanna Christen) isch e Volkskundleri gsi und di grööscht Sammleri vo Schwiizer Volksmusig. I ihrer Sammlig sind under anderem öppe 12.000 Volksmelodie us de Ziit zwüsched 1800 und 1940.
S Hanny Christen isch d Tochter vo de Sophie und em Oscar Christen-Spinnler und isch am 3. Augschte 1899 zäme mit ihrere Zwillingsschwöschter Trudy z Liestel gebore worde. Si isch z Basel ufgwachse, deet id Töchtereschuel und häd e umfassendi musikalischi Musigusbildig übercho. Won si d Notize vo irem Grossvater, em Regierigsrat Jakob Christen, glääse häd, häd si sich aafange für d Gschicht und s Bruuchtum vom Baselbiet z intressiere. S Hanny Chrischte isch z Fuess ufproche zum das sälber z erläbe. Immer mee häd si nöd nume nach Sitte und Brüüch, Anekdote und Sage gfrööget, sondern immer mee au nach Volksmusig, Tänz und Musikante won traditionelli Musig spilet.
Nachdem si s Baselbiet abklapperet gha häd, isch si wiiter gange, vo Dorf zu Dorf, vo Hof zu Hof, im Lauf vo de Jaar dur 21 Kantöön. Überal hät si Musig gsammlet, uufgschribe und mängisch au vo alte Musikante Notesammlige übercho oder törfe abschriibe. Wil si sälber hät chöne Klavier und Chello spile, au guet gsunge hät, hät si ring de Kontakt zu de Lüüt gfunde. Dank irem guete Ghöör und em guete Gedächtnis, häd si di gsammleti Musig auch guet chöne ufschriibe. Spööter hät s «Musighanneli» au äis vo de eerschte, no unförmige Tonbandgrät pruucht. Immer wider häd si versuecht, die Tänz und Musig a Trachtegruppe, Tanzveräin oder em Radio wiiter z gee, vergäbis. Si isch am 29. Juni 1976 gstoorbe.
Am 21. April 1963 häd s Hanny Christen ihre Nachlass de Universitätsbibliothek Basel gee. Die händ d Schachtle in Chäller gschtellt, wos vergässe gange sind. Erscht knapp 30 Jaar spööter häts si de Fabian Müller entdeckt und di ganzi Sammlig suber erfasst und editiert. Sithär sind d Noote und d Fotene im Staatsarchiv Basel-Landschaft und Tonbänder i de Schwiizer Nationalphonothek.
De Nachlass bestaat us ere riisige Notensammlig, Tonbänder, Fotene, Schrifte zu Volkstänz, Volkslied, Musiker, Musiginstrumänt, Trachte, Wanderige, Brüüche und äigeti Publikatione.
D Notesammlig isch hüt uf öppe 5000 Siite als elfbändigs Wärch au im Handel.