Dr George Vancouver (* 22. Juni 1757 z King’s Lynn, Norfolk; † 10. Mai 1798 z Petersham bi Richmond upon Thames, Surrey) isch en Offizier in dr britische Royal Navy gsi und en Entdecker. Er isch für d Erforschig vo dr Pazifikküste vo Nordamerika vo Kalifornie über Oregon, Washington und British Columbia bis uf Alaska bekannt worde. Er het au d Südwestküste vo Australie erforscht und mit em Kamehameha I., wo spööter Köönig vo Hawaii worde isch, Verhandlige gfüert. Noch iim si d Groossstedt Vancouver in dr kanadische Browinz British Columbia, Vancouver im US-Bundesstaat Washington und d Insle Vancouver Island benennt.
Dr Vancouver isch Midshipman uf em Cook sim Schiff HMS Discovery, won dä si dritti Südseeräis (1776–1779/1780) gmacht het. 1780 isch er zum Lütnant befürderet worde. 1782 isch er bi dr Schlacht vo Les Saintes drbii gsi. 1791 isch er mit dr HMS Discovery und und dr HMS Chatham d Südwestküste vo Australie go kartografiere und drbii häi si d Snaresinsle und d Chatham-Insle entdeggt. denn si si über Tahiti uf Hawaii. Vo 1792 bis 1794 het er d Westküste vo Noramerika erforscht und isch jede Winter uf Hawaii go überwintere. Dört het er em Kamehameha I. ghulfe d Inselgrubbe politisch z veräinige. Über s Kap Hoorn isch er denn häimgfaare. Dört isch er für si Verhalte stark kritisiert worde. Er isch chrank worde, het sich im Novämber 1795 vo dr Royal Navy lo bangsioniere und isch uf Petersham, eme chliine Dorf bi Richmond upon Thames go woon, und het dört si Expedizionsbricht gschriibe. Er isch am 10. Mai 1798 gstorbe.
Commons: George Vancouver – Sammlig vo Multimediadateie
|
Dä Artikel basiert uff ere fräie Übersetzig vum Artikel „George_Vancozver“ vu de dütsche Wikipedia. E Liste vu de Autore un Versione isch do z finde. |