Dr Fritz Widmer (* 5. Februar 1938 z Chiubärg; † 28. April 2010[1] z Bärn[2]) isch e Schwyzer Lehrer, Liedermacher un Schriftsteller. gsi.
Dr Widmer isch uf eme Buurehof z Chiubärg ufgwagse. Uf d Schuel gange isch er z Chiubärg un z Burgdorf, derno het er Anglistik un Germanistik studiert. Ab 1965 het er as Sekundarlehrer z Fraubrunne, ab 1970 as Änglisch- un Dytschlehrer an dr Hechere Mittelschuel Marzili z Bärn.
Dernäbe isch er syt 1965 Liederibersetzer, Liedermacher un Schriftsteller gsi. Syy Lieder het er zerscht unter em Yyfluss vum Mani Matter verfasst, dailwyys au zämme mit em. Speter sin e Huffe aigeni Lieder entstande un Noogstaltige un Ibersetzige vu schwedischen Lieder, zem Byschpel vum Carl Michael Bellman. Ab 1965 isch er Mitglid vu dr Berner Troubadours gsi un het no 1970 in dr Hauptsach Soloprogramm gmacht, syt 1982 allmeh kombiniert mit Läsige us syyne Roman, Kolumne un Gedicht. Zämme mit em Jacob Stickelberger het er e Ufnahm gmacht vu dr letschte (nonig vereffetligte) Chanson vum Mani Matter un dr Kriminalgschicht, ere Art Kriminaloper, wun er mit em Stickelberger zämme gschribe het un wu si zwische 1973 un 1975 iber hundertmol ufgfiert hän.
Uf syyne neie Blatte het er nit solo gspilt, är isch zmaischt beglaitet wore vu syyne Dechtere Anna (Cello, Mandoline) un Karin (Violine, Gitarre, Bouzouki) un syym langjehrige Beglaitgitarrischt Michael Sam Graf, em Akkordeonspiler Otto Spirig un em Kontrabassischt Bänz Hadorn.
Syter anne 1982 het er Kolumne un Artikel fir verschideni Zytige gschribe. Är het näbe vier Roman au Rundfunkbyydreg verfasst, tem Byschpel vu 1994 bis 2000 s Wort zum neuen Tag fir Radio DRS. Mit syyre Frau Christina, ere Änkeldochter vum Hermann Hesse, het er als Vordreg ghalte iber ihre beriemte Großvatter, un er het anne 2006 e Buech uusegee mit Läbenserinnerige vu Carl Hermann Hesse, em baltische Großvatter vum Hermann Hesse.
![]() |
Dä Artikel basiert uff ere fräie Übersetzig vu dere Version vum Artikel „Fritz_Widmer“ vu de dütsche Wikipedia. E Liste vu de Autore un Versione isch do z finde. |