![]() ![]() | |
URL | www.facebook.com |
Kommerziäll | jo |
Bschryybig | Gmeinschaftsportal bzw. Online-Kontaktnetzwärch |
Regischtrierig | jo |
Sproche | 84 Sprochversione (dodrunter Dytsch) (Stand: 28. Juli 2010) |
Eigetimer | Facebook Inc. |
Urheber | Mark Zuckerberg, Dustin Moskovitz (Mitgrinder), Chris Hughes (Mitgrinder), Eduardo Saverin (Mitgrinder) |
Erschine | Februar 2004 |
Facebook isch e Websyte zum Bilde un Unterhalte vu soziale Netzwärch, wu vu dr Firma Facebook Inc. mit Sitz im kalifornische Palo Alto bedribe wird.
De Name chunt vom änglischi Wort für d Johrbiecher mit de Gsichter vu dr Studänte, wo vil amerikanischi Colleges produziere.
Di greschte Aadeilseigner sin 2012 no dr Schwyzer Handelszeitung dr Mark Zuckerberg (28,2 %), Accel Partners (10 %), dr Dustin Moskovitz (7,6 %),d Mail.ru Group (5,4 %), dr Eduardo Saverin (4 %), dr Sean Parker (4 %), dr Peter Thiel (2,5 %), d Sheryl Sandberg (1,8 %), Microsoft (1,5 %) un Greylock Partners gsii.[1] Im dritte Quartal 2015 het d Plattform no eigene Aagabe wältwyt 1,5 Milliarde aktivi Nutzer gha.
Jede Benutzer het e Profilsyte, wun er sich druf cha vorstelle un Foto oder Video cha uffelade. Uf dr Pinnwand vum Profil chenne Bsuecher effetli sichtbari Nochrichte hinterloo oder Notize/Blog vereffetlige. Alternativ zue effetlige Nochrichte chenne sich Benutzer persenlgi Nochrichte schicke oder tschätte.
Frynd chenne zue Gruppe oder Event yyglade wäre.
Facebook het derzue au no ne Märtblatz, wu Benutzer Chleiaazeige chenne ufgee un bschaue. Dur e Beobachtigslischt wird mer iber Nejs informiert, z. B. neji Pinnwandyydreg uf dr Profilsyte vu Frynd. D Benutzer uf Facebook sin in Universitets-, Schuel-, Arbetsblatz- un Regionenetzwärch yydeilt.
Facebook chunt wäge dr ibergrosse Macht vu dr Syte im Internet und dr Verbreitig vo schädlichen Inhalt immer wider in Verruef.
Dr Mark Zuckerberg het Facebook zämme mit dr Studänte Eduardo Saverin, Dustin Moskovitz un Chris Hughes im Februar 2004 an der Harvard University entwicklet, ursringli nume fir di dertige Studänte. Speter isch d Websyte fir Studänte in dr Vereinigte Staate frejgee wore. Wyteri Expansionsschritte hän d Aamäldmegligkeit au uf High Schools uusdehnt un uf Firmemitarbeiter. Im Septämber 2006 hän si au Studänte an uusländische Hochschuele chenne aamälde, speter isch d Websyte fir alli Nutzer frejgee wore. Im Friejohr 2008 isch d Websyte au in dr Sproche Dytsch, Spanisch un Franzesisch aabote wore,[2] ab em zweite Quartal 2008 sin wyteri Sproche derzue chuu, hite wäre 84 Lokalisierige aabote.
Im alemannische Ruum sin verschidni scherzhafti Wörter für Facebook uffcho. Die Begriff sin meischt Lehnübersetzige vum änglische face ‚Gsicht‘ un book ‚Buech‘. So het's im „Züri-Slängikon“ d Yyträg „s Fratzebuech“ un „s Gsichtsbuech“. In de Basler Zytig isch im Februar 2011 en Artikel zur Sproochsituation im Elsass erschiene, mit em Titel Sogar auf dem Fràtz Büech lebt das Elsässisch. Und en pänsionierte Idiotikon-Mitarbeiter, de Noldi Hammer, het di scherzhaft Ibersetzig „Faxebuech“ uffbroocht.