Dialäkt: Bärndütsch |
Dr Eragon isch d Houptfigur vo de Eragon Büecher vom Christopher Paolini, ämnä amerikanische Schriftschteuer. Die Büecher gits uf Hochdütsch bim cbj Verlag.
Der Eragon läbt mit sim Onku Garrow und däm si Sohn Roran am Rand vom Dörfli Carvahall, das ligt ds Alagaësia. Eines Tages, wo dr Eragon wider einisch uf der Jagt im Buckel, ämnä Gebirgszug, isch, erschiint plötzlech mit emne Knau e schöne, glänzende Schtei vor im. Wüetend, wiu vom Knau aues Wiud wäggrent isch, nimmt dr Eragon dä Schtei mit itz Dorf, vilech chaner dä ja gägä Gäut tusche. Doch d Händler im Dorf hei no nie so öppis gse. Miz ir Nacht schlüpft de us däm Schtei ä blaue Drache. Wone dr Eragon berüert, fangt sini Handflächi merkwürdig afa z lüchte, es isch d Gedwëy Ignasia, di siubrigi Hand, wo se zu Drache und Riter macht. Är nennt se Saphira. Früecher si Dracheriter zueschtändig für Rächt und Ordnig gsi, aber die Zite si längscht verbi. Aus nöi Dracheriter bedrohe si itze dr Galbatorix, säuber Dracheriter, dr grausam Herrscher vo Alagaësia. Dä isch nume at Macht cho, wiu er aui andere Dracheriter umbracht het. Eines Tages touche d Ra`zac, grausami Scherge vom Chünig, z Carvahall uf und schteue Frage nach em Dracheei. Si töte dr Garrow, dr Eragon und dr Roran chöme mit em Läbe dervo. Dr Eragon beschliesst de Ra`zac z fouge und si Onku z räche. Dr Brom, ä Gschichteverzeuer, chunt äbefaus mit. Är lernt ne ungerwägs viu übere Schwärtkampf und über Magie. So faat es ungloublechs Abetüür aa...
Im zwöite Teil geit dr Eragon mit dr Saphira, em Orik und dr Arya nach Du Weldenvarden, äm Verschteck vo de Elfe, um sini Usbiudig aus Dracheriter z beände. D Zyt drängt, die Mächtige vo Alagaësia ringe um jede Meter...
Das Buech isch es tüpischs Fantasy-Buech mit Ritter, Drache, Magie u. a. Zuäsätzlich sind nu äs par ander Velker wo schusch sältä ir Fantasy-Literatuir vor chemid erfunde wordä. Zum Biispill Urgals oder d Ra’zac.
Der Auftrag des Ältesten, Site 660: Das finstere Meer wogte unter der Drachenschwinge auf und ab und trug das Schiff zum nächsten schäumenden Wellenkamm empor. Dort verharrte es einen Moment lang schaukelnd, um anschliessend wieder in den dahinter liegenden Meeresschlund hinabzustürzen. Weisse Gischtwolken sprühten durch die Luft, während der Wind stöhnte und heulte wie ein gespenstisches Ungeheuer.
Dr Christopher Paolini versuecht immer wider, d Umgäbig am Läser gnauschtens z vermittle. Auerdings erkennt dr Herr vo de Ringe -kenner einigi Sache wider, wie zischendi, brutali Urgals oder dr gheimnissvou aut Brom mit vorliebi fürs Rouchringe mache.
Wenns scho mit Herr vo de Ringe vergliche wirt, söt me säge, dass sech dr Schtiuu völlig vom däm vom Tolkien ungerscheidet. Eragon isch a einige schteue mit erne "flache" Sprach gschribe, was vilicht dra ligt, dass der Autor ersch 15 isch gsi, won er het aagfange.
Ds dritte Buech isch am 20. September 2008 uf Englisch erschine, di dütsch Übersetzig am 25. Oktober 2008 usecho.[1] Der viert und letscht Teil isch am 8. November 2011 uf Englisch und am 19. November 2011 uf Dütsch erschine.[2]
20th Century Fox het dr erscht Band vom Eragon verfiumt. Är isch am 14. Dezember 2006 in d Kinos cho. Dräiort isch Ungarn gsi.
Am Christopher Paolini (* 17. Novämber 1983) sini Liideschaft für Fantasy und Science Fiction hei ne für Eragon – Das Vermächtnis der Drachenreiter inschpiriert, woner mit 15 gschribe het. Är isch deheim vo sire Muetter ungerrichtet worde.