Dr Bruno Epple (* 1. Juli 1931 z Rielasinge im Hegau; † 11. August 2023 z Alleschbach[1]) isch e dytsche Schriftsteller un Dichter gsi. Är wird au dr Wangener Molerpoet gnännt.
D Familie vum Epple isch anne 1935 uf Radolfzell zoge, wun er mit drei Gschwischtrig ufgwagsen isch. No dr Volksschuel isch er vier Johr uf d Oberealschuel un ab 1946 z Konschtanz uf s Heinrich-Suso-Gymnasium. 1950 isch em e Freiblatz am Lyzeum un Internat vu dr Stiftsschuel vum Benediktinerchloschter z Engelberg im Schwyzer Kanton Obwalde aabote wore, dert het er im Juli 1952 di altsprochlig Matura gmacht.
Im Spotjohr 1952 het er an dr Universitet Frybeg aagfange Dytsch, Gschicht, Romanischtik un Philisophi studiere, im Spotjohr 1954 isch er fir zwai Semeschter an d Ludwig-Maximilians-Universitet z Minche. Im franzesische Rouen isch er e Zytlang Assistant gsii un het schließli z Frybeg s Studium abschlosse.
As Referendar het dr Bepple an Schuele z Konschtanz un z Singe gschafft, derno het er langi Zyt as Lehrer Dytsch, Gschicht un Franzesisch unterrichtet, z Säckige, z Konschtanz un vor allem z Radolfzell. Anne 1972 isch er zum Gymnasialprofessor ernännt wore. Im Johr 1989 het er sich vum Schueldienscht beurlaube loo un het ab do as freie Moler un Schriftsteller gläbt.
Syyni erschte Gedicht im bodeseealemannische Dialäkt het er im Mai 1955 gschribe, aagregt dur d Beschäftigung mit em Mittelhochdytsch in syre Studiezyt z Minche.
Dr Bruno Epple isch syt 1960 ghyrote, syy Frau Doris het friejer as Optikermaischteri gschafft. Syt 1965 läbt un schafft er z Wange uf dr Höri am Bodesee.
Dr Epple isch Mitglid im dytschschwyzerische PEN un in dr Literarische Gsellschaft Forum Allmende, dert Grindigsmitglid im „Freundeskreis Jacob Picard“[2][3] gsii