| Dialäkt: Schwäbisch |
Dr Auguscht Halm (* 26. Oktober 1869 z Großaltdorf, heit a Stadtdoil vo Vellberg em Landkreis Schwäbisch Hall, † 1. Februar 1929 z Saalfeld en Thiirenga) ischt a deitscher Kombonischt, Musikpädagog ond Musikschriftsteller gwäa.
Dr Auguscht Halm ischt am 26. Oktober 1869 em wirdabergischa Städtle Großaltdorf uff d Welt komma. Sei Vadder isch en sellem Ort evangelischer Pfarrer gwäa. Nôch-em Abidur isch dr Auguscht Halm zonägschd amôl en d Fuaßstapfa vo seim Vadder tredda, ond hôt an dr Uni Diibenga ôôgfange, Theologii zo studiira. Wia-nr dô drmit ferdich gwäa ischt, hôt’r z Mincha beim oinzig bekannda liachdasteinischa Kombonischda Josef Gabriel Rheinberger Musik studiirt.
1903 isch dr Halm Musiklehrer em Landerzihongsheim em thiirengischa Haubinda wôrra, wo vo seim Freind Hermann Lietz, ama Reformpädagoga ond Vadder vo de Landschuelheim, grendet wôrra ischt. En sellra Eirichdong hôt’r sich bsondrs intensiv om d musikalischa Jugendbewegong kemmret ond gildet heit als dera ihr Wortfihrer. 1910 hôt’r zor Freia Schuelgemeinde Wickersdorf bei Saalfeld am Rand vom Thirenger Wald gwechslet, wo-nr sei musikpädagogischa Arbet weidrgfihrt hôt. Noh em gleicha Jôhr hôt’s da Halm nôch Ulm vrschlaga, wo-nr a Stell als Chorleiter kriagt hôt. Drei Jôhr schbäter ischt’r Musiklehrer an-ra Stuegerter Schuel wôrra. 1920 ischt dr Halm nôch Wickersdorf zruckganga, wo-nr da Rescht vo seim Leaba vorbrôcht hôt.
Am 1. Februar 1929 hôt dr Halm em thiirengischa Städtle Saalfeld seine Auga fir emmer gschlossa. Grad amôl 60 Jôhr alt ischt’r wôrra. Heitzodag send seine Werk weitgehend vrgessa.