Arischtau | |
---|---|
![]() | |
Basisdate | |
Staat: | Schwiiz |
Kanton: | Aargau (AG) |
Bezirk: | Muri |
BFS-Nr.: | 4222 |
Poschtleitzahl: | 5628 |
Koordinate: | 669887 / 237966 |
Höchi: | 401 m ü. M. |
Flächi: | 8.64 km² |
Iiwohner: | 1588 (31. Dezämber 2022)[1] |
Website: | www.aristau.ch |
![]() Aristau | |
Charte | |
![]() |
Arischtau (offiziell: Aristau) isch e Iiwohnergmeind im Bezirk Muri im Schwiizer Kanton Aargau. Si ligt im Rüüsstal an de Gränze zum Kanton Züri.
D Gmeind Aristau bsteht us drüne Dörfer, wo öppe gliich gross sind. Alli liget weschtlich vo de Rüüss, öppe ei bis zwei Kilometer vom Fluss ewäg. Di drü Dörfer sind Althüsere, Arischtau und Birri.
De Gmeindsbann het e Flächi vo 864 Hektare, dodervo sind 132 Hektare Wald und 80 Hektare sind überbaut. De höchschti Punkt vo de Gmeind isch uf 475 Meter ü. M., de tüüfschti uf 380 Meter. D Nachbargmeinde sind di Aargauer Gmeinde Merischwand, Muri, Bosmel, Bäsibüre, Rotteschwil und Jooneund di Zürcher Gmeind Ottebach.
Arischtau isch zum erschte Mol in ere Urkund us em Johr 1153 in de Form Arnestowo erwähnt. Im Mittelalter het s Gmeindsbiet zerscht de Grafe vo Länzbrg ghört. Wo des Gschlecht im 1173i usgschtorbe-n-isch, hei d Kyburger s Erbe und dodermit d Landesherrschaft übernoh. Im 1264i isch d Landesherrschaft dann an d Habsburger gfalle.
Im 1415i hei Eidgenosse de Aargau erobert u e so isch Arischtau, Althüsere und Birri en Teil vom Amt Muri in de Freie Ämter worde, ere gemeine Herrschaft. Im März 1798 sind d Franzose in d Schwiiz iimarschiirt und hei di Helvetisch Republik usgrüeft. Di drü Dörfer hei in dere Ziit zum Kanton Bade ghört, wo 1803 zum noie Kanton Aargau cho isch. D Dörfer sind im noie Kanton im 1816 zu einer Gmeind zämme cho.