En archimedischi Schruube isch e Fürderaalaag, wo e «Schnägg» in dr Form von ere Schruube e wääsentlige Däil von ere isch. Die klassischi Aawändig vo dr archimedische Schruube isch dr Dransport vo Wasser uf e hööchers Nivoo zum s Land bewässere oder entwässere. Iiri Erfindig wird em antike griechische Mathematiker und Ääscheniöör Archimedes in dr Zit vom 3. Joorhundert v. d. Z. zuegschriibe. S Brinzip vo dr archimedische Schruube wird in modärne Förderaalaage, sogenannte Schnäggeförderer, aagwändet.
S Schnäggegwind befindet sich im ene Droog oder ere Rööre, wo äng aabasst isch, und cha sich um iiri Middelaggse drülle. Dr Schnägg und dr Droog bilde Kammere, wo s Wasser in ene stoot. Die Kammere si gege oobe und gege unde dur Abschnitt vo dr Windig vom Schnäggegwind begränzt. Wenn sich dr Schnägg dräit, beweege sich alli Kammere in Richdig vom Andi vom Schnäggegwind. Dört lauft s Wasser us dr Kammere uuse, wil dr Droog ufhöört und d Kammere sich uflööst. Am Aafang vom Schnäggegwind entstoot gliichzitig e nöiji Kammere, wo sich mit Wasser us em Zuelauf uffüllt.
Die archimedischi Schruube isch e Sonderfall vom Schnäggeförderer, wil do nume d Schwerchraft middelbar usgnützt wird, zum s Fördermedium z dransbortiere. Wäge däm cha mä mit dr archimedische Schruube nume horizontal oder schreeg ufwärts fördere, wäärend Schnäggeförderer Güeter au sänkrächt chönne fördere.
![]() |
Dä Artikel basiert uff ere fräie Übersetzig vum Artikel „Archimedische_Schraube“ vu de dütsche Wikipedia. E Liste vu de Autore un Versione isch do z finde. |