Dr Andreas Blum (* 21. Februar 1938; † 26. Jänner 2024;[1] haimebrächtigt z Riidu, ab 2006 z Räide) isch e Schwyzer Radioschurnalischt un Diräkter vu Schwyzer Radio DRS (1979–1999) gsii.
Dr Andreas Blum isch z Zug ufgwagse. Noch em Studium vu dr Gschicht un Filosofy z Minche, z Bärn un z Baasel het er anne 1967 bi dr SRG aafange schaffe. Vu 1975 bis 1979 isch er Mitglid vum Nazionalroot fir d SP gsii. As Spitzesportler het er in dr 1960er un 1970er Johr Modärne Fimfkampf gmacht.[1]
As Schauspiler het mer dr Andreas Blum u. a. in dr Fäärnsehserie Salto Mortale chenne sää, är het au verschideni Sändige vum Schwyzer Fäärnseh moderiert, wie d Telebühne. Dodin het er versuecht, kritisch un kontrovers dr aktuäll Zytgaischt z spiegle. Dr Blum het Ändi 1950er Johr aafange schaupilere un het bis 1972 vor allem in Fäärnsehprodukzione mitgwirkt. Zue syne wenige Kinofilm ghert d Literaturverfilmig Frau Cheneys Ende (1961). Im Summer 2011 het er bi dr Thuner Seespiil d Titelrolle im Musical Gotthelf gspiilt.
Näbe me Beruef isch er Mitglid vum Akzionskumitee vu Brot fir Brieder, Bresidänt vu dr Schwyzer Säkzion vu Amnesty International, Mitglid vu dr Mänscherächtskummission vum Schwyzerische Evangelische Chilchebund, vu 1985 bis 1990 Bresidänt vu Swissaid, bis Mitti 2006 Bresidänt vu dr Finanzierigskummission vu dr Glückskette un vu 2001 bis 2007 Vorstandsmitglid vu Exit, verantwortli fir Kommunikazion, gsii.
Dr Blum het drei Chinder ghaa un isch in dritter Eh ghyrote gsii.
![]() |
Dä Artikel basiert uff ere fräie Übersetzig vu dere Version vum Artikel „Andreas_Blum_(Journalist)“ vu de dütsche Wikipedia. E Liste vu de Autore un Versione isch do z finde. |