Àmerikànisch Anglisch (American English) | ||
---|---|---|
Verbreitig: | ![]() | |
Sprecher: | äbba 260 Mio. (2016) | |
Linguistischi Klassifikation: |
| |
Offizieller Status | ||
Amtssprooch vo: | ![]() |
Dialäkt: Mìlhüüserdiitsch |
Àmerikànisch Anglisch (anglisch American English [əˈmɛɹɪkən ˈɪŋɡlɪʃ](info), kurz AE odd’r AmE) ìsch d’ Wàrianta vu dr anglischa Schprooch, wo ìn da Verainigta Schtààta vun Àmerika grädd wìrd.
Ìn siinera Gschìcht ìsch s’ àmerikànischa Anglisch dur d’ verschììdena anglischa Dialäkter vu da Iiwànderer üss Anglànd, Schottlànd un Irlànd beiiflusst worra, àwwer àui dur Schproochkontàkta mìt Frànzoosa, Schpànier un àmerikànischa Üriiwoohner. S’ uffàllendschta Märkmool vum àmerikànischa Anglisch ìsch d’ Tàtsàch, àss’s rhootisch ìsch: dr r-Lüüt wìrd àui nooh Vokààla (zem Biischpììl am Wortand) üssgschproocha. S’ àmerikànischa Anglisch hàt a aiga Wortschàtz, wo sìch vum Wortschàtz vum britischa Anglisch zem Tail unterschaidet — zem Biischpììl fìr „Füassgangerwaag“ sajt maa sidewalk uff Àmerikànisch àwwer pavement ìm britischa Anglisch. Ìm Vergliich zem britischa Anglisch ìsch d’ àmerikànischa Wàrianta relàtiiv homogeen. ’S gìtt doch àui regionààla Unterschììd, vor àllem zwìschem Nordoschta, em Süüda, dr Mìtta un em Wäschta vu da USA. ’S gìtt àui Schproochunterschììd zwìscha da verschììdena Beväälkerungsgruppa; d’ wìchtigschta d’rvuu sìnn s’ African American Vernacular English bii da Àfroàmerikàner un s’ Hispanic American English bii da Hispano-Àmerikàner. S’ àmerikànischa Schtàndardanglisch wìrd àls General American bezaichent; ’s wìrd vor àllem ìm Wäschta vu da USA grädd. Sitter’m And vum 19. Joohrhundert düen sìch vììla Schproochwìssaschàftler mìt’m àmerikànischa Anglisch beschaftiga — sitterhar sìnn mehrera Wärterbiacher un a schproochliger Atlas vum àmerikànischa Anglisch veräffentligt worra.
Maa sajt, àss s’ àmerikànischa Anglisch a nàzionààla Wàrianta vu dr wäschtgermànischa Schprooch Anglisch ìsch. Zamma mìt àndra nàzionààla Wàrianta vum Anglischa, wia zem Biischpììl s’ britischa Anglisch, s’ àuischtrààlischa Anglisch odd’r s’ näiseelandisch Anglisch, wìrd s’ àmerikànischa Anglisch àui àls a Wàrietäät vu dr plurizäntrischa anglischa Schprooch bezaichent. S’ àmerikànischa Anglisch ìsch aina vu da Wàrietääta vum Anglischa, wo bii dr Mehrhait vu dr Beväälkerung d’ Müatterschprooch vun ìhra Reedner ìsch. ’S gìtt àwwer nàdììrlig ìn da USA àui Mìnderhaita, wo àndra Schproocha reeda un Anglisch àls Zwaitschprooch glarnt hann, wia zem Biischpììl d’ schpànisch- frànzeesch-, diitsch- und kineesischschproochiga Mìnderhaita.[1] Domìt düet sìch s’ àmerikànischa Anglisch vu nàzionààla Wàrianta vun àndra Lander unterschaida, vor àllem ìn Àfrikà un Àsia, wia zem Biischpììl vum ìndischa Anglisch: ìn dana Lander ìsch Anglisch zwàr hüüfig Àmtsschprooch un schpììlt a groossa Roola ìn da Meedia un ìm Bìldungssüschteem, àwwer ’s wìrd numma-n-àls Zwaitschprooch vu da maischta Reedner benutzt.[2]
S’ àmerikànisch Anglisch ìsch zamma mìt’m britischa Anglisch a Hàuiptwàrietäät vum Anglisch. Amerikànisch Anglisch wìrd ìn vììla Lander, wu Anglisch àls Zwait- odd’r Främdschproocha grädd wìrd, àls Laitnorm ààglüagt. Vor àllem ìn Àsia hàt Àmerikànisch s’ britischa Anglisch àls Vorbìld àbgleest.[1] Dr Iifluss vu dr anglischa Schprooch, bsunders vum amerikànischa-n-Anglisch ìn dr Walt wìrd ìmmer greesser. Doo drbii schpììlt d’ àmerikànischa Filmìndüschtrii un Popmüüsik a wìchtiga Rolla, wia àui d’ Rolla vum Àmerikànisch Anglisch àls Unterrìchtschprooch ìn vììla Schtààta.[3]
![]() |
Dä Artikel basiert uff ere fräie Übersetzig vu dere Version vum Artikel „Amerikanisches_Englisch“ vu de hochdütsche Wikipedia. E Liste vu de Autore un Versione isch do z finde. |