Dr Alexander Sergejewitsch Puschkin (russisch Александр Серге́евич Пу́шкин, wiss. Transliteration Aleksandr Sergeevič Puškin; * 26. Maijul./6. Junigreg. 1799 z Moskau; † 29. Jännerjul./10. Februargreg. 1837 z Sankt Petersburg) gältet as russische Nazionaldichder und Gründer vo dr modärne russische Litratuur.
Dr Alexander Puschkin isch 1799 z Moskau uf d Wält choo. Väterligersits stammt er vom ene alte Aadelsgschlächt ab, müeterligersits vom ene afrikanische Sklav. Er isch säggs Joor lang uf s Lyzeum Zarskoje Selo gange und het in deere Zit dr Russlandfäldzuug vom Napoleon (1812) erläbt. Er isch in absentia Mitgliid vo dr Petersburger literaarische Gsellschaft Arsamas vom W. A. Schukowski worde, wo sich für e Witerentwicklig vo dr russische Hooch-/Schriftsprooch iigsetzt het. 1816 het dr Puschkin vor allem Elegie afo schriibe.
Noch em Lyzeum isch er Kollegiesekretär am Petersburger Kollegium für Uswärtigi Aagläägehäite worde, isch vil in s Theater gange und Mitgliid vo dr Litratuur- und Theatergmäinschaft Grüeni Lampe (Зелёная лампа) worde, wo vo dr Dekabristebeweegig beiiflusst gsi isch. Dr Puschkin het immer wider politischi Epigramm und Gedicht wie К Чаадаеву (Liebe, Hoffnung, stiller Ruhm...), Вольность, Н. Я. Плюсковой (alle 1818), Деревня (1819) gschriibe und s määrlihafti Värsepos Ruslan und Ljudmila (Руслан и Людмила) verfasst, wo vo dr Kritik verrisse worde isch.
Im Früelig 1820 weer dr Puschkin wägen e baar Spottgedicht fast uf Sibirie verbannt worde. Er het Petersburg verloo, isch chrank worde und denn vom August bis Septämber über d Krim uf Odessa gräist. 1820 isch er Mitgliid bi dr Filiki Eteria worde. Bis 1824 het er im Süüde vo Russland gläbt, under anderem z Odessa, Kischinjow und Kamjanka. 1823 het er si bedütendsts Wärk, s Värsepos Eugen Onegin aagfange, won er mit em erst 1830 fertig worde isch.
1824 isch dr Puschkin us em Staatsdienst entloo worde, wil er im ene Brief positiv über en Atheismus gschriibe het. Er het denn uf em Guet Michailowskoje vo sine Eltere müesse go lääbe, won en d Behörde die ganz Zit kontrolliert häi. Er het am ene Gedichtband gschafft und d Dragödie Boris Godunow fertig gschriibe.
Er het en Audiänz bim Zar Nikolaus I. überchoo und vo denn aa wider z Moskau und Petersburg döfe lääbe, isch aber immer no kontrolliert und zensiert worde.
1831 het er d Natalja Gontscharowa ghürootet. Si Vater het em s Dorf Boldino, 250 km vo Nischni Nowgorod ewägg, gschänkt. Won er dört aane isch uf Bsuech, het er wägen ere Choleraepidemii nid zrugg uf Moskau chönne und het dört in dr Browinz afo schriibe und das isch si grössti Schaffensperiode worde.
D Puschkins si 1831 uf Petersburg züüglet. S Lääbe in dr hooche Gsellschaft und am Hoof het dr Puschkin aber frustriert. Er vil ghändlet vilmol wäge nüt und sini Wärk si in dere Zit under groossem psüchischem Druck entstande.
1836 het er d Litraturzitschrift Sowremennik (Der Zeitgenosse) döfe uusegee und d Zensur isch nüm ganz eso strikt gsi.
Dr Puschkin und si Frau Natalja häi z Sankt Petersburg dr Georges-Charles de Heeckeren d’Anthès kennegleert. Dä het dr Natalja iiri Schwöster Katharina Gontscharowa ghürootet, het aber äinewääg dr Natalja Puschkina uf provozierendi Art dr Hoof gmacht. Grücht si ufchoo, ass im Puschkin si Frau en Affääre mit em häig. Dr Puschkin het em Heeckeren e Brief gschriibe, won er en din beläidigt het, und dä het en zum Duell uusegforderet. Das het am 27 Jännerjul./8. Februar 1837greg. 1837 stattgfunde. Dr Puschkin isch in Buuch gschosse worde und zwei Dääg spööter an dr Verletzig gstorbe. Mä het en im Swjatogorski-Chloster im hütige Puschkinskije Gory bi Pskow begraabe.
Für die mäiste Russe gältet dr Puschkin as Nazionaldichder (vil eender as Schriftsteller wie dr Tolstoi, Dostojewski, Gogol oder Pasternak, wo im Usland bekannter si).
Bis dass dr Napoleon 1812 in Russland iigfalle isch, het die russischi Ooberschicht Franzöösisch gschwätzt. Das isch denn aber noch em Brand vo Moskau seer vil weeniger beliebt worde und dr Puschkin het mit sine Gedicht, Drame und Erzäälige d Umgangssprooch erhoobe; er het e Stil ghaa, wo der Drama, Romantik und Satire vrmischt het und dä isch sithäär mit dr russische Litratuur verbunde. Sini romantische Zitgenosse si dr Byron und dr Goethe gsi; är sälber isch vom Voltaire und de Dragöödie vom Shakespeare beiiflusst worde.
Alexander Sergejewitsch Puschkin im dütschsprochige Wikisource
Alexander Sergejewitsch Puschkin im dütschsprochige Wikisource
![]() |
Dä Artikel basiert uff ere fräie Übersetzig vum Artikel „Alexander_Sergejewitsch_Puschkin“ vu de dütsche Wikipedia. E Liste vu de Autore un Versione isch do z finde. |