Dr Alexander Roger Schweitzer (* 17. Septämber 1973 z Landaach) isch e dytsche Bolitiker (SPD). Är isch syt em 10. Juli 2024 Minischterbresidänt vu Rhyyland-Bfalz. Är isch vu 2014 bis 2021 Vorsitzer vu dr SPD-Frakzion im Landdaag vu Rhyyland-Bfalz gsii un vu 2021 bis 2024 Minischter fir Arbet, Sozials, Dransformazion un Digitalisierig[1] im Kabinett Dreyer III. Är ghert syt Dezember 2017 em SPD-Barteivorstand aa.
Dr Alexander Schweitzer isch e Suhn vun eme Binneschiffer un het syni erschte segs Lääbesjohr mit syne Eltere un syre Schweschter uf Binnefrachter zwische Kallsruh un Rotterdam verbrocht. Noch eme Abitur 1993 z Bad Berchzawre het er Räächtswisseschafte an dr Uni Määnz studiert.
Noch em Staatsexame 2001 het er bi re Agäntur vum Land Bade-Wirttebärg gschafft. 2005 isch er Brojäktlaiter bim Steinbeis-Transferzäntrum z Haidelberch un Dozänt an dr Beruefsakademy Mosbach wore.
Dr Schweitzer isch remisch-kadolisch un ghyrote. Är het drei Chinder.
Anne 1989 isch dr Schweitzer in d SPD yydrätte. Vu 1993 bis 1995 isch er stellverdrättende Landesvorsitzer vu dr Jusos Rhyyland-Bfalz un vu 1995 bis 1997 Vorsitzer vu dr Jusos im Bezirk Bfalz gsii. 1995 isch er au in Vorstand vum SPD-Bezirk Bfalz gwehlt wore, wun er bis 2013 aaghert het. Vu 1997 bis 2004 isch er Vorsitzer vum SPD-Ortsverband Billigheim-Ingenheim un vu 2002 bis 2005 im Unterbezirk Landau-Land gsii. 2002 isch er in Landesvorstand vu dr SPD Rhyyland-Bfalz gwehlt wore un isch dert ain vu dr drei stellverdrättende Vorsitzer gsii. Zletscht isch er uf em Landesbartedaag am 4. Novämber 2023 widergwehlt wore.[2] 2004 isch er Mitglid vum Landesbresidum wore un Vorsitzer vum Kraisverband Sidligi Wyystroß.
Anne 1999 isch dr Schweitzer in Kraisdaag Sidligi Wyystroß un in Gmairoot vu dr Verbandsgmai Landau-Land gwehlt wore, wun er 2007 Vorsitzer vu dr SPD-Frakzion woren isch. Vu Juni 2006 bis Juli 2009 isch er Abgornete vum Landdaag Rhyyland-Bfalz gsii un sich s wider syter 2013.
Ab 2009 isch dr Schweitzer Staatssekreter im Minischterium fir Wirtschaft, Verchehr, Landwirtschaft un Wyybäu Rhyyland-Bfalz gsii as Noofolger vum Carsten Kühl, wu Finanzminischter woren isch.[3] No dr Landdaagswahl 2011 isch dr Schweitzer neie Generalsekreter vu dr rhyyland-bfälzische SPD wore[4] as Noofolger vu dr Heike Raab, wu as Staatssekreteri ins nei gschaffe Minischterium vum Inner, fir Sport un Infrastruktur gwägslet isch. Vum 16. Jänner 2013 bis zum 12. Novämber 2014 isch dr Schweitzer Sozialminischter im Kabinett Dreyer I|ersten Kabinett vu dr Malu Dreyer gsii. Deruf isch er vu 2014 bis 2021 Frakzionsvorsitzer vu dr SPD im Landdaag Rhyyland-Bfalz.[5]
Am 8. Dezember 2017 isch er uf em Bundesbarteidaag as Byysitzer in SPD-Barteivorstand gwehlt wore. Im Dezämber 2023 isch er wider in des Amt gwehlt wore.[6] No dr Landdaagswahl am 14. Merz 2021 het dr Schweitzer s Amt vum Minischter fir Arbet, Sozials, Dransformazion un Digitalisierig im Kabinett Dreyer III ibernuu.[7]
Am 10. Juli 2024 isch dr Schweitzer as Noofolger vu dr Malu Dreyer zum Minischterbresidänt vum Land Rhyyland-Bfalz gwehlt wore. Är het doderby mit 57 Stimme drei meh iberchuu, wie di Regierigsfrakzione zäme hän. Derno het er s Kabinett Schweitzer bildet.[8]
Dr Schweitzer isch Mitglid vum 1. FC Kaiserslautern.[9] Är isch Vorsitzer vu dr Fritz-Walter-Stiftig, wu si fir d Ferderig vu dr sportlige Jugedarbet, dr soziale Dailhab vu Jugedlige un dr sportli un kulturäll Uusdusch mit Mittel- un Oschteuropa yysetze duet.[10]
Commons: Alexander Schweitzer – Sammlig vo Multimediadateie
|
Dä Artikel basiert uff ere fräie Übersetzig vu dere Version vum Artikel „Alexander_Schweitzer_(Politiker)“ vu de dütsche Wikipedia. E Liste vu de Autore un Versione isch do z finde. |