D Adelheid Studer-Thiersch (* 30. Septämber 1939 z Recklinghausen as Adelheid Thiersch; † 18. Juni 2020 z Basel[1]) isch e Schwyzer Ornithologi un Ethologi gsii. Ire Hauptinträssi het dr Flamingo gulte.[2]
Uusbildig un Beruef
D Adelheid Thiersch isch ab 1945 z Recklinghausen uf d Schuel gange un het dert 1958 s Abitur gmacht, No dr Schuel het si ne Volontariat im Zoologische Garte Baasel gmacht. Vu 1958 bis 1966 het si an dr Uniwersitete Baasel, Mainz, München un Münster Zoology, Chemy un Botanik studiert. Vu 1959 bis 1960 het si as Assischtänti vum Eberhard Curio am Max-Planck-Inschtitut fir Verhaltesfisliology z Seewiesen in dr Abailig vum Konrad Lorenz gschafft. Dää het si in irem Wunsch gsterkt, s Sozialverhalte vu dr Flamingo z erforsche.
Anne 1966 isch si bim Konrad Lorenz mit dr Disserzazion Die sogenannte Balz der Flamingos (Gattung Phoenicopterus) an dr Westfälischen Wilhelms-Universität Münster zum Dr. rer. nat. promowiert wore.
Ab 1967 het si as extärni wisseschaftligi Mitarbaiteri am Zolli z Baasel gschafft. Im nämlige Johr het si Freilandstudie an Rosaflamingo in dr Laguna de Fuente de Piedra, Spanie, gmacht. Vu 1968 bis 1973 het si as wisseschaftligi Mitarbaiteri an dr Schwyzerische Vogelwarte Sempach gschafft. In däne Johr isch si au Co-Redakteri vu dr Zytschrift Der Ornithologische Beobachter gsii, wu vu dr Ala, Schwyzerischi Gsellschaft fir Vogelkunde un Vogelschutz, uusegee wird.
D Adelheid Studer-Thiersch isch 1974 wisseschaftlgi Beroteri bi Filmufnahme uf Cousin Island Seychelle) zue dr Theme Naturschutz, Feenseeschwalbe un Ächti Karettschildchrotte gsii. Anne 1979 het si ne Studie zue dr Bruetbiology vu dr Feenseeschwalbe uf Cousin Island gmacht. Vu 1987 bis 1998 isch si redakteri vu dr Johresbericht vu dr Ornithologische Gsellschaft Baasel gii.
Zue dr Studieprojäkt vu dr Studer-Thiersch hän d Aabassige im Furtbflanzigsverhalte vu dr Flamingo an uuregelmäßigi Bruetbedingige, d Phylogeny vu dr hitige Flamingoarte un d Haltig un d Lääbeswys vu Flamingogruppe in Zoo ghert.[3]
Anne 1967 het d Studer-Thiersch d Schrift Beiträge zur Brutbiologie der Flamingos (Gattung Phoenicopterus) uusegee, 1973 het si dr Bydrag iber d Flamingo im erschte Vogelband vu Grzimeks Tierleben gschriibe.[4] 1975 d Bydreg Flamingos in captivity – Basel Zoo un Group display in Phoenicopterus im Wärch Flamingos vu dr Janet Kear un dr Nicole Duplaix.[5]
Privatlääbe
Anne 1963 het si dr Peter Studer ghyrote, wu vu 1994 bis 2005 Diräkter vum Baasler Zolli gsii isch. Si het mit iim zwee Sihn ghaa, Niklaus un Kaspar.
Uuszaichnige un Mitgliidschafte
Anne 2014 isch d Studer-Thiersch vu dr International Flamingo Community fir iri Arbet im Zoo Baasel uuszaichnet wore.
D Studer-Thiersch isch Mitglid gsii vu dr Dytsche Ornithologe-Gsellschaft, vu dr Ala, Schwyzerischi Gsellschaft fir Vogelkunde un Vogelschutz (Vorstandsmitglid vu 1971 bis 1974), vu dr British Ornithologists’ Union, vu dr Ethologische Gsellschaft e. V., vu dr Ornithologische Gsellschaft Baasel (Vorstandsmitglid vu 1987 bis 1998), vu dr European Association of Zoos and Aquaria (EAZA) Taxon Advisory Groups Ciconiiformes & Phoenicopteriformes, vu dr IUCN SSC Flamingo Specialist Group, in dr Waterbird Society, bi Pro Natura Baasel un bi dr Kantonale Natur- un Landschaftschutzkummission vum Kanton Baasel-Stadt.
