Spider-Man | |
Spider-Man in Madame Tussauds in Londen.
| |
Skepping | |
---|---|
Eerste verskyning | Amazing Fantasy #15 (Augustus 1962) |
Geskep deur | Marvel Comics Stan Lee en Steve Ditko |
Uitgebeeld deur | O.a. Danny Seagren, Tobey Maguire, Andrew Garfield, Tom Holland |
Inligting | |
Byname | O.a. Spidey, Webhead, Webslinger, Wall-Crawler, Masked Marvel, Webspinner, Dusk, Hornet, Ben Reilly, Scarlet Spider |
Alter ego | Peter Benjamin Parker |
Spesie | Mutant |
Spider-Man is 'n superheld in Amerikaanse strokiesverhale van Marvel Comics. Die karakter is deur die skrywer-redakteur Stan Lee en kunstenaar Steve Ditko geskep en verskyn die eerste keer in Amazing Fantasy #15 (Augustus 1962). Hy is te sien in onder andere strokiesverhale, rolprente, televisieprente en videospeletjies.
Spider-Man se geheime identiteit is Peter Benjamin Parker, 'n tienderjarige hoërskoolleerling. Hy is 'n weeskind wat deur sy tante May en oom Ben in New York grootgemaak word nadat sy ouers, Richard en Mary Parker, in 'n vliegongeluk omgekom het. Lee en Ditko laat die karakter sukkel met adolessensie- en finansiële probleme, en hy het baie ondersteunende karakters soos Flash Thompson, J. Jonah Jameson en Harry Osborn. Onder sy romantiese verbintenisse tel Gwen Stacy, Mary Jane Watson en Black Cat, en sy vyande sluit in die Green Goblin, Doctor Octopus en Venom.
In die oorspronklike storie kry Spider-Man sy superkragte nadat hy deur 'n radioaktiewe spinnekop gebyt is; dié kragte sluit in bomenslike krag, ratsheid, reflekse, stamina, 'n uithouvermoë, koördinasie en balans, om soos 'n spinnekop aan oppervlakke en plafonne te klou en gevaar aan te voel met sy "spider-sense". Hy bou ook uit sy polse kunsmatige spinnerakke wat hy gebruik om te veg en oor die stad te swaai. Peter Parker het aanvanklik sy magte vir eie gewin gebruik, maar nadat sy oom Ben vermoor is deur 'n dief wat Peter nie gekeer het nie, begin hy sy magte gebruik om misdaad te beveg deur die superheld Spider-Man te word.
Toe Spider-Man in die vroeë 1960's die eerste keer verskyn, het tieners in superheldboeke gewoonlik die taak gehad om die hoofkarakter te help. Die Spider-Man-strokiesreeks het die voortou geneem deur Peter Parker, 'n leerling van Queens, New York, te gebruik as Spider-Man se geheime identiteit – sy obsessie met verwerping, onbekwaamheid en eensaamheid was sake waarby jong lesers aansluiting kon vind.[1] Spider-Man het nie soos vorige tienerhelde 'n superheldmentor soos Captain America en Batman gehad nie; hy het self geleer met groot mag kom groot verantwoordelikheid – dit was 'n reël in die laaste paneel van Spider-Man se oorspronklike storie, maar later het sy oom Ben terugwerkend die krediet daarvoor gekry.
Marvel het Spider-Man in verskeie strokiesreekse gebruik. Die eerste een, wat ook die langste voortduur, is The Amazing Spider-Man. Deur die jare het Peter Parker se karakter ontwikkel van 'n skaam bleeksiel tot 'n gekwelde, maar uitgaande leerling, 'n getroude hoërskoolonderwyser en, in die 2000's, 'n enkellopende vryskutfotograaf. In die 2000's sluit hy by die Avengers aan.
Marvel het ook strokiesverhale gepubliseer met alternatiewe weergawes van Spider-Man, insluitende Spider-Man 2099, met die avonture van Miguel O'Hara, die Spider-Man van die toekoms; Ultimate Spider-Man, met die avonture van 'n tienderjarige Peter Parker in 'n ander heelal; en Ultimate Comics: Spider-Man, met die tiener Miles Morales wat Spider-Man se skoene vol staan ná Ultimate Peter Parker se skynbare dood. Miles het later 'n superheld uit eie reg geword en werk nou soms saam met Peter.
Spider-Man is een van die gewildste en kommersieel suksesvolste superhelde.[2] Hy het al in talle verskillende media verskyn. Spider-Man is van 1974 tot 1977 die eerste keer deur Danny Seagren uitgebeeld in die skets Spidey Super Stories in die TV-reeks The Electric Company.[3] Ander akteurs wat die rol van die karakter vertolk het, is Tobey Maguire, Andrew Garfield[4] en Tom Holland.
Peter Parker het bomenslike spinnekopkragte en -vermoëns gekry nadat 'n radioaktiewe spinnekop hom gebyt het.[5] Sedert die oorspronklike karakter deur Lee en Ditko geskep is, het Spider-Man die vermoë ontwikkel om teen mure te klou. Daar is gespekuleer dit is vanweë 'n afstandafhanklike wisselwerking tussen sy liggaam en oppervlakke, bekend as Van der Waals se krag,[6] maar in die rolprent Spider-Man van 2002 was sy hande en voete uitgevoer met fyn haartjies soos dié van 'n regte spinnekop. Spider-Man se ander kragte sluit in bomenslike krag, ratsheid en balans, asook 'n "spider-sense" wat hom teen gevaar waarsku.[5]
Spider-Man het ook 'n helende faktor wat hom in staat stel om te herstel van beserings wat hy tydens gevegte opdoen.[7] Ná die storielyn van 1989 se Acts of Vengeance is gesê Spider-Man het "bomenslike herstelvermoëns" wat sy herstel bespoedig het nadat hy die Tri-Sentinel verslaan het.[8]
Die karakter wat Lee en Ditko aanvanklik geskep het, was intellektueel begaaf, maar latere skrywers het sy intellek uitgebeeld as op die vlak van 'n genie.[9] Ná jare van veg het Parker sy bekwaamheid uitgebrei tot op 'n vlak gelykstaande aan 'n vegkuns wat uitstekend by sy kragte pas. Die akademies briljante Parker het kennis op die gebied van toegepaste wetenskap, chemie, fisika, biologie, ingenieurswese, wiskunde en meganika.
Hy gebruik sy talent om sy eie kostuum te maak om sy identiteit te verbloem. Hy maak ook baie toestelle wat sy kragte komplementeer, veral die meganiese toestel waarmee hy spinnerakdrade uit sy polse skiet om teen hoë snelhede oor die stad te swaai, om hom te help navigeer en sy vyande in sy spinnerakke vas te vang.[5] Die wetenskaplike Thomas Fireheart se span, wat van die bestes in die wêreld is, kon nie die vloeistof namaak wat Peter gemaak het terwyl hy op hoërskool was nie.[10]
In 1962, ná die sukses van die Fantastic Four, het Marvel Comics se redakteur en hoofskrywer, Stan Lee, besluit om die idee van 'n superheld verder te voer. Volgens hom het die idee vir Spider-Man gekom van die toename in die gewildheid van strokiesverhale onder tieners en sy begeerte om 'n karakter te skep waarmee tieners hulle kon vereenselwig.[12]:1 Nes met die Fantastic Four, het Lee Spider-Man beskou as 'n geleentheid om dit wat hy gevoel het kortkom in strokiesverhale, "uit sy gestel te kry".[13] In sy outobiografie sê Lee die niesupermens-misdaadvegter Spider in 'n pulptydskrif was 'n groot invloed.[11]:130[14] In talle onderhoude het hy ook gesê hy is verder geïnspireer deurdat hy gesien het hoe 'n spinnekop teen 'n muur opklim. Volgens hom het hy dié storie so baie vertel dat hy onseker was of dit waar is of nie.[15] Benewens sy naam is die Spider gesoek deur die polisie én die misdaadonderwêreld ('n kenmerkende tema in Spider-Man se vroeë jare), en hy het ná jare van 'n eindelose stryd 'n "sesde sintuig" ontwikkel wat hom teen gevaar waarsku: die skynbare inspirasie vir Spider-Man se "spider-sense".[14]
Hoewel tienerhelde in dié jare gewoonlik 'n naam gehad het wat met "boy" eindig, het Lee die naam "Spider-Man" gekies omdat hy wou hê die karakter moet ouer word namate die reeks vorder. Hy het verder gevoel die naam "Spider-Boy" sou die karakter minderwaardig teenoor ander superhelde maak.[16] Hy het die koppelteken in die naam gesit omdat hy gevoel het "Spiderman" lyk te veel soos Superman, 'n ander superheld in 'n rooi-en-blou kostuum wat met 'n "S" begin en met "man" eindig[17] (hoewel die kunstenaar, Steve Ditko, aanvanklik beplan het om Spider-Man 'n oranje-en-pers kostuum te gee).[18]
In dié stadium moes Lee net die toestemming van die Marvel-uitgewer, Martin Goodman, kry vir die skep van die karakter. Hoewel Goodman aanvanklik skepties was, het hy eindelik ingestem en die kunstenaar Jack Kirby genader. Hy het Lee vertel van 'n ongepubliseerde karakter waaraan hy in 1950 gewerk het: 'n weeskind wat saam met 'n bejaarde egpaar woon en 'n towerring ontdek wat hom superkragte gee. Die twee het ooreengekom dat Kitby die karakter sou teken. Steve Ditko sou die inkleurwerk doen.[19] Toe Kirby aan Lee die eerste ses velle van sy tekeninge wys, het Lee nie daarvan gehou nie omdat dit nie die karakter was wat hy in gedagte gehad het nie. "Hy was te heldagtig."[20]:12 Lee het hom tot Ditko gewend, wie se visuele styl hom tevrede gestel het.
Hoewel Ditko alleen die tekenwerk gedoen het, het Lee Kirby gevra om die voorblad te teken wat Ditko toe ingekleur het.[21]
Met die skepping van die karakter het Ditko 'n ateljee in Manhattan gedeel met die bekende fetisjkunstenaar Eric Stanton, 'n medestudent op kunsskool. In 'n onderhoud het Stanton gesê hy en Ditko het saamgewerk aan 'n paar idees, hoewel hy feitlik niks tot Spider-Man bygedra het nie. "Ek dink ek het die besigheid bygevoeg waar spinnerakdrade uit sy hande kom."[20]:14
'n Paar maande ná Spider-Man se bekendstelling het Goodman, die uitgewer, na die verkoopsyfers van Amazing Fantasy gekyk en tot sy verbasing gesien dit was een van die wordende Marvel Comics se beste verkope.[22]:97 'n Volgende reeks met net dié karakter en die titel The Amazing Spider-Man #1 (Maart 1963) is uitgegee. Dit het eindelik Marvel se topreeks geword[1]:211 en Spider-Man was gou 'n kultuurikoon. 'n Meningspeiling in 1965 deur die tydskrif Esquire op universiteitskampusse het aan die lig gebring studente lys Spider-Man en 'n ander Marvel-superheld, die Hulk, saam met Bob Dylan en Che Guevara as hulle gunsteling- revolusionêre ikone. Een deelnemer het Spider-Man gekies omdat hy "geteister word deur elendes, geldprobleme en bestaansvrae. Kortom, hy is een van ons."[1]:223 Nadat Ditko ná uitgawe #38 (Julie 1966) by Marvel weg is, het John Romita sr. hom as tekenaar vervang en hy sou die reeks 'n paar jaar lank teken.
In die vroeë 1970's het Spider-Man eindelik gehelp om die gesagskode vir strokiesverhale te verander. Voorheen het die kode die uitbeelding van die gebruik van dwelms verbied, selfs op 'n negatiewe manier. In 1970 het die Nixon-administrasie se departement van gesondheid, opvoeding en welsyn Stan Lee gevra om 'n boodskap teen die gebruik van dwelms in een van Marvel se toverkopers te publiseer.[1]:239 Lee het The Amazing Spider-Man, uitgawes #96-98 (Mei-Julie 1971) gekies om die negatiewe gevolge van dwelmmisbruik uit te beeld. In die storie raak Peter Parker se vriend Harry Osborn verslaaf aan pille. Toe Spider-Man teen die Green Goblin (Norman Osborn, Harry se pa) veg, klop Spider-Man hom deur aan hom Harry se dwelmmisbruik te openbaar. Hoewel die storie 'n duidelike boodskap teen dwemmisbruik gehad het, het die Comics Code Authority geweier om dit sy stempel van goedkeuring te gee. Marvel het nogtans die drie uitgawes gepubliseer. Dit het so goed gevaar dat die nywerheid se selfopgelegde sensuur geboemerang het en die kode is daarna hersien.[1]:239
In 1972 het 'n tweede maandelikse reeks met Spider-Man begin: Marvel Team-Up, waarin Spider-Man saam met ander superhelde en -skurke verskyn.[23] Van toe af was daar op enige gegewe tydstip minstens twee aaneenlopende Spider-Man-reekse. In 1976 het 'n tweede soloreeks, Peter Parker, the Spectacular Spider-Man begin samelopend met die hoofreeks.[24] 'n Derde reeks met Spider-Man, Web of Spider-Man, het in 1985 begin om Marvel Team-Up te vervang.[25] 'n Vierde maandelikse reeks, Peter Parker: Spider-Man, het sy debuut in 1990 gemaak met verskeie verskillende voorblaaie, maar dieselfde inhoud. Van die verskeie weergawes is altesaam meer as 3 miljoen eksemplare verkoop: Dit was toe 'n rekord in die nywerheid. Verskeie minireekse, solo-uitgawes en losweg verwante strokiesverhale is ook al gepubliseer. Spider-Man maak ook dikwels kamee- en gasverskynings in ander reekse.[24][26] In 1996 is The Sensational Spider-Man geskep om Web of Spider-Man te vervang.[27]
In 1998 het die skrywer-kunstenaar John Byrne die oorsprong van Spider-Man herskep in die beperkte reeks met 13 uitgawes Spider-Man: Chapter One (Desember 1998 - Oktober 1999).[28] Terselfdertyd is die oorspronklike The Amazing Spider-Man beëindig met uitgawe #441 (November 1998). In Januarie 1999 is The Amazing Spider-Man hervat met vol. 2, #1.[29] In Desember 2003 het Marvel die oorspronklike nommers van die reeks hervat met die bekendstelling van #500 in plaas van vol. 2, #59.[29]
Ná uitgawe #545 (Desember 2007) het Marvel sy ander Spider-Man-reekse beëindig en begin om The Amazing Spider-Man drie keer per maand te publiseer (#546-548 het al drie in Januarie 2008 verskyn).[30] Dit het geduur tot November 2010, toe die strokiesboek se dikte verander is van 22 tot 30 bladsy per uitgawe. Dit is van toe af net twee keer per maand gepubliseer (vanaf #648-649, in November 2010).[31][32]
Die volgende jaar het Marvel Avenging Spider-Man geloods as die eerste splinterreeks sedert 2007, tesame met die hoofreeks wat steeds twee keer per maand verskyn het.[30] Die Amazing-reeks is in Desember 2012 tydelik gestaak ná uitgawe #700 en is vervang met The Superior Spider-Man. Daarin is Doctor Octopus die nuwe Spider-Man, nadat sy brein Peter Parker se liggaam oorgeneem het. Superior was 'n enorme kommersiële sukses vir Marvel,[33] en het 31 uitgawes lank verskyn voordat die regte Peter Parker teruggekeer het in 'n nuwe, herskepte The Amazing Spider-Man #1 (April 2014).[34]
Daar is baie ander karakters in stories van Spider-Man wat vir hom noodsaaklik is. Nadat sy ouers, Richard en Mary Parker, dood is, is Peter grootgemaak deur sy liefdevolle tante, May Parker, en sy oom en vaderfiguur, Ben Parker. Nadat oom Ben deur 'n inbreker vermoor is, is sy tante sy enigste familielid, en sy en Peter is baie na aan mekaar.[35]
J. Jonah Jameson is die uitgewer van die Daily Bugle en Peter se baas. Hy is baie krities teenoor Spider-Man en publiseer gereeld negatiewe berigte oor hom in sy koerant. Ondanks sy rol as Jameson se redakteur en vertroueling, is Robbie Robertson 'n ondersteuner van beide Spider-Man en sy alter ego, Peter.[36]
Eugene "Flash" Thompson word algemeen uitgebeeld as Peter se boelie op hoërskool; hy bewonder Spider-Man, maar weet nie dit is eintlik Peter nie. In latere strokiesverhale word hy 'n vriend van Peter en kry hy sy eie superheld-identiteit, Agent Venom, nadat hy saamsmelt met die Venom-simbioot.[36] Harry Osborn, die seun van Norman Osborn, is Peter se beste vriend, hoewel hy in sommige uitgawes Peter se teenstander is.[37]
Skrywers en kunstenaars het deur die jare 'n magdom superskurke geskep wat Spider-Man se vyande is, in strokiesverhale en in ander media. Nes met die held die geval is, ontstaan die meeste skurke se superkragte met wetenskaplike ongelukke of die misbruik van wetenskaplike tegnologie. Baie het kostuums en kragte met 'n dieretema.[38] Die bekendstes word hier onder genoem, in 'n chronologiese volgorde:
Superskurk se naam | Alter ego | Eerste verskyning | Skepper |
---|---|---|---|
Chameleon | Dmitri Nikolayevich | The Amazing Spider-Man #1 (Maart 1963)[39][40] | Stan Lee[39][40] Steve Ditko[39][40] |
Vulture | Adrian Toomes | The Amazing Spider-Man #2 (Mei 1963)[41][42] | Stan Lee[41][43] Steve Ditko[41] |
Doctor Octopus | Otto Octavius | The Amazing Spider-Man #3 (Julie 1963)[40] | Stan Lee[44] Steve Ditko |
Sandman | William Baker / Flint Marko | The Amazing Spider-Man #4 (September 1963)[45] | Stan Lee[45] Steve Ditko[45] |
Lizard | Curt Connors | The Amazing Spider-Man #6 (November 1963)[46][47] | Stan Lee[46][47] Steve Ditko[46][47] |
Electro | Max Dillon | The Amazing Spider-Man #9 (Februarie 1964)[48] | Stan Lee[49] Steve Ditko[49] |
Mysterio | Quentin Beck | The Amazing Spider-Man #13 (Junie 1964) | Stan Lee[50] Steve Ditko[50] |
Green Goblin | Norman Osborn Harry Osborn[51] |
The Amazing Spider-Man #14 (Julie 1964) | Stan Lee[52] Steve Ditko[52] |
Kraven the Hunter | Sergei Kravinoff | The Amazing Spider-Man #15 (Augustus 1964)[52] | Stan Lee[52] Steve Ditko[52] |
Scorpion | Mac Gargan | The Amazing Spider-Man #20 (Januarie 1965) | Stan Lee[53] Steve Ditko[53] |
Rhino | Aleksei Sytsevich | The Amazing Spider-Man #41 (Oktober 1966) | Stan Lee[54] John Romita sr.[54] |
Shocker | Herman Schultz | The Amazing Spider-Man #46 (Maart 1967) | Stan Lee[55] John Romita Sr.[55] |
Kingpin | Wilson Fisk | The Amazing Spider-Man #50 (Julie 1967)[56] |
Stan Lee[57] John Romita sr.[57] |
Morbius[58] | Michael Morbius | The Amazing Spider-Man #101 (Januarie 1971)[59] | Roy Thomas[59] Gil Kane[60] |
Black Cat | Felicia Hardy | The Amazing Spider-Man #194 (Julie 1979) | Marv Wolfman Keith Pollard |
Hobgoblin | Roderick Kingsley Jason Macendale[61] Ned Leeds[61] |
The Amazing Spider-Man #238 (Maart 1983) | Roger Stern John Romita sr.[62] |
Venom | Eddie Brock | The Amazing Spider-Man #300 (Mei 1988)[63] | David Michelinie[64] Todd McFarlane[65] |
Carnage | Cletus Kasady | The Amazing Spider-Man #361 (April 1992)[66] | David Michelinie[67] Erik Larsen[68] Mark Bagley[67] |
Anders as die meeste superhelde het Spider-Man nie 'n enkele skurk waarmee hy die meeste bots nie. Hy het egter drie aartsvyande:
Peter Parker se romantiese verbintenisse strek van sy eerste skoolliefde, sy medeleerling Liz Allan,[36] tot sy eerste afspraak met Betty Brant,[73] die sekretaresse van Daily Bugle se uitgewer, J. Jonah Jameson. Nadat die verhouding tussen hulle beëindig is, het hy verlief geraak op sy meisie op universiteit, Gwen Stacy,[37][74] dogter van kaptein Stacy van die New Yorkse polisie. Albei word later deur vyande van Spider-Man vermoor.[36] Mary Jane Watson word eindelik Peter se beste vriendin en sy vrou.[36] Felicia Hardy, die Black Cat, is 'n hervormde klouterdief wat in 'n stadium Spider-Man se enigste supermensmeisie word.[75]
Deur die jare het Peter Parker verskeie biologiese kinders gehad, gewoonlik by Mary Jane Watson. Dit sluit in Spider-Girl (Mayday Parker) en Benjy Parker van die MC2 universe en Spiderling (Annie Parker) van Earth-18119.[76][77]
In Forest Hills, Queens, New York, is Peter Parker 'n student aan die Midtown High School. Hy is 'n wetenskapslim weeskind wat by sy oom Ben en tante May woon. In Amazing Fantasy #15 (Augustus 1962) word gewys hoe hy op 'n wetenskapuitstalling deur 'n radioaktiewe spinnekop gebyt word en eienskappe van 'n spinnekop ontwikkel.[35] Benewens verhoogde atletiese vermoëns kan hy ook aan mure en plafonne vasklou. Omdat hy goed is met wetenskap, ontwerp hy toestelle wat klewende webdrade uit sy polse kan skiet.
Hy wil aanvanklik geld maak uit sy nuwe vermoëns en maak 'n kostuum vir homself. As "Spider-Man" word hy 'n TV-ster. Hy ignoreer egter die kans om 'n vlugtende inbreker te keer, en dié beroof later vir oom Ben en vermoor hom. Spider-Man spoor die moordenaar op en leer so: "Met groot mag kom groot verantwoordelikheid!"[78]
In The Amazing Spider-Man #1 (Maart 1963) sukkel Peter ondanks sy superkragte om tante May te help om die huur te betaal. As Spider-Man hou hy aan om misdade te beveg en die stad te red, maar sy heldedade ontlok die kritiek van die redakteur van die koerant Daily Bugle, J. Jonah Jameson. Hy het 'n grief teen Spider-Man en hou aan valse beskuldigings teen hom inbring, ondanks sy heldedade. Peter word deur mnr. Jameson as fotograaf gehuur om foto's van Spider-Man te neem, maar hy is onbewus daarvan dat Peter Spider-Man is.[79]
Spider-Man veg teen sy vyande, wat superskurke met én sonder superkragte is. Sy aartsvyande is onder andere die Green Goblin, Doctor Octopus, Sandman, Chameleon, Lizard, Vulture, Electro en Mysterio – hy klop hulle die een ná die ander,[37] maar Peter vind dit moeilik om 'n balans te vind tussen sy persoonlike en superheldbedrywighede. Later maak Peter klaar met hoërskool[80] en skryf hy in aan die Empire State University ('n fiktiewe instelling),[81] waar hy sy kamermaat en beste vriend, Harry Osborn, en meisie, Gwen Stacy, ontmoet.[74] Tante May stel hom ook bekend aan Mary Jane Watson.[37][82][83]
Tydens Peter se stryd met Harry se dwelmprobleem en sy ontdekking dat Harry se pa, Norman Osborn, die Green Goblin is, probeer Peter om sy kostuumlewe vir 'n ruk te staak.[84] Gwen Stacy se pa, 'n speurkaptein van die New Yorkse polisie, word vermoor tydens 'n geveg tussen Spider-Man en Doctor Octopus (#90, November 1970).[85]
In #121 (Junie 1973)[37] gooi die Green Goblin vir Gwen Stacy van 'n hoë toring af. Sy sterf tydens Spider-Man se reddingspoging en Spider-Man sweer wraak teen sy vyand. 'n Nota in #125 verduidelik dit was juis die sweepslageffek toe Spider-Man se spinnerakdrade haar so vinnig stop wat haar dood veroorsaak het.[86] In die volgende uitgawe val Spider-Man die Green Goblin aan en oorrompel hom. Dit lyk of die skurk homself per ongeluk doodmaak tydens die geveg met Spider-Man.[87]
Nadat Peter Gwen se dood verwerk het, ontwikkel hy gevoelens vir Mary Jane, en die twee "word vriende, eerder as minnaars".[88] 'n Romantiewe verhouding ontstaan later wel, en Peter vra haar om te trou in #182 (Julie 1978). In die volgende uitgawe sê sy egter nee.[89] In #185 gradueer Peter[37] en hy raak later betrokke by die skaam Debra Whitman en die uitgaande, flirterige kostuumdief Felicia Hardy, ook bekend as die Black Cat.
Van 1984 tot 1988 het Spider-Man 'n swart kostuum met 'n wit spinnekopontwerp op die bors gedra. Die oorsprong van die swart kostuum was Secret Wars ('n beperkte minireeks), wat op 'n ander planeet afspeel waar Spider-Man deelneem aan 'n geveg tussen die aarde se grootste superhelde en -skurke.[90]
Spider-Man hou aan om die kostuum te dra toe hy terugkeer, vanaf The Amazing Spider-Man #252. Die herontwerp van sy kostuum was omstrede en ongewild. Sy aanhangers het gevoel sy tradisionele rooi-en-blou kostuum is ikonies, soortgelyk aan dié van DC Comics se karakters soos Superman en Batman.[91] Die skeppers het toe onthul die kostuum was 'n buiteaardse simbioot wat Spider-Man kan verwerp ná 'n moeilike stryd, hoewel die simbioot verskeie kere as Venom terugeer om wraak te neem.[37]
Parker vra Mary Jane Watson in The Amazing Spider-Man #290 (Julie 1987) weer om te trou en sy sê ja twee uitgawes later. Die troue vind plaas in The Amazing Spider-Man Annual #21 (1987).[92] David Michelinie, wat die storie gskryf het, het in 2007 gesê: "Ek dink nie hulle moes getrou het nie...Ek het 'n ander weergawe beplan wat nie gebruik is nie."[92] Parker publiseer 'n boek met Spider-Man-foto's met die naam Webs[93] en keer terug universiteit toe om biochemie te studeer in #310 (Desember 1988).[37]
In die omstrede[94] storielyn van die 1990's "Clone Saga" keer 'n kloon van Parker, wat in die 1970's deur die mal wetenskaplike Miles Warren, ook bekend as die Jackal, geskep is terug na New York nadat hy gehoor het tante May se gesondheid gaan agteruit. Die kloon het incognito as "Ben Reilly" geleef, maar neem nou die identiteit van Scarlet Spider aan en werk saam met Parker. Tot albei se verbasing dui nuwe toetse aan "Reilly" is die oorspronklike Spider-Man en "Parker" die kloon.[95]
Om sake verder te kompliseer kondig Watson in The Spectacular Spider-Man #220 (Januarie 1995) aan sy verwag Parker se baba.[37] Later laat 'n herrese Green Goblin (Norman Osborn) Watson vergiftig en veroorsaak dat Parker se ongebore dogter sterf.[96] Die Green Goblin het die toetsresultate omgeruil in 'n poging om Parker se lewe te vernietig deur hom te laat glo hy is self die kloon. Reilly sterf terwyl hy Parker red in Peter Parker: Spider-Man #75 (Desember 1996), en sy liggaam verbrokkel dadelik tot stof, wat bevestig dat hy die kloon was.[96]
In The Amazing Spider-Man (vol. 2) #13 (#454, Januarie 2000) sterf Watson skynbaar in 'n vliegtuigontploffing.[97] Sy verskyn weer in (vol. 2) #28 (#469, April 2001),[97] maar sy en Peter skei in die volgende uitgawe.[98]
Die skepper van Babylon 5, J. Michael Straczynski, begin The Amazing Spider-Man skryf en dit word geïllustreer deur John Romita jr., vanaf (vol. 2) #30 (#471, Junie 2001). Twee uitgawes later ontmoet Parker, wat nou 'n onderwyser aan sy ou hoërskool is, die enigmatiese Ezekiel, wat soortgelyke kragte besit en voorstel Parker se vermoëns is nie 'n gelukskoot nie, maar dat hy 'n verbintenis het met 'n totem-spinnekopgees. In (vol. 2) #37 (#478, Januarie 2002) ontdek May Peter is Spider-Man, en dit lei tot 'n nuwe openheid in hulle verhouding.[99] Parker en Watson raak versoen in (vol. 2) #50 (#491, April 2003),[99] en in #512 (November 2004, nadat die oorspronklike nommers hervat is) vind Parker uit sy oorlede meisie Gwen Stacy het twee kinders by Norman Osborn gehad.[100]
Hy sluit by die New Avengers-span aan in New Avengers #1-2. Nadat Parker, Watson en May se onderskeie huise vernietig is deur 'n waarsinninge voormalige skoolmaat van Parker met supermagte, trek hulle in Stark Tower in, en Parker begin werk as Tony Stark se assistent terwyl hy ook weer vryskutwerk by die Daily Bugle begin doen en aanhou klasgee. In die storie in 12 dele van 2005 "Spider-Man: The Other", ondergaan Parker 'n transformasie wat sy kragte laat ontwikkel. In Civil War #2 (Junie 2006) dwing die Superhuman Registration Act Spider-Man om sy ware identiteit in die openbaar te onthul. 'n Toenemende ongemaklikheid met die Registration Act laat hom ontsnap saam met May en Watson, en hulle sluit aan by die ondergondse beweging teen die registrasie.
In #537 (Desember 2006) word May ernstig gewond deur 'n sluipskutter wat deur Wilson Fisk gehuur is, en sy verval in 'n koma. Parker, wat desperaat is om haar te red, gaan 'n ooreenkoms aan met die demoon Mephisto. Dié red May se lewe in ruil daarvoor dat Parker en Watson instem dat hulle huwelik en enige herinnering daaraan uitgewis word. In dié veranderde werklikheid is Spider-Man se identiteit weer eens 'n geheim. In #545 (Januarie 2008) keer Watson terug en is sy koud teenoor hom.
Die omstrede[101] storielyn "One More Day" rol baie van die storie terug vanweë die idees van die Marvel-hoofredakteur Joe Quesada, wat sê: "Dat Peter enkellopend is, is 'n intrinsieke deel van die fondament van die wêreld van Spider-Man."[101] Dit veroorsaak wrywing tussen Quesada en die skrywer Straczynski, wat sy naam verwyder wil hê in die laaste twee uitgawes van die storielyn, maar hy word oorreed om dit in te hou.[102]
Parker keer weer terug na die Daily Bugle, wat onder 'n nuwe redakteur tot The DB hernoem is.[103] Hy sluit daarna by die alternatiewe koerant The Front Line aan.[104] J. Jonah Jameson word in #591 (Junie 2008) die burgemeester van New York.[100] Jameson se vervreemde pa, J. Jonah Jameson sr., trou in #600 (September 2009) met May.[100][105]
Op aanbeveling van Loki beplan Norman Osborn om Asgard in te val; hy beweer die wêreld het 'n nasionale veiligheidsbedreiging nodig. Hy word egter verslaan en beland in die Raft-gevangenis.[106] 'n Konflik tussen Spider-Man en Doctor Octopus oor Osborn se seun eindig toe onthul word Harry is die kind se pa. Harry verlaat die stad om hom groot te maak.[107]
Een van Doctor Octopus se Octobots slaag daarin om die Doctor en Spider Man se persoonlikhede om te ruil. Dit veroorsaak dat Peter vasgevang word in die Doctor se sterwende liggaam, terwyl hy Peter se lewe oorneem. Hoewel Peter nie die verandering ongedaan kan maak nie, slaag hy daarin om 'n swak skakel met die Doctor se brein te vestig, en hy dwing hom om al sy herinneringe te herleef; Otto Octavius verstaan Peter se ideale van mag en verantwoordelikheid en belowe om Peter se lewe met waardigheid voort te sit as 'n "Superieure" Spider-Man.[108][109]
'n Deel van Peter oorleef in sy oorspronklike liggaam in die vorm van 'n onderbewussyn.[110] Later besef Otto hy het gefaal in sy rol as die "Superieure" Spider-Man en hy willig in dat Peter sy liggaam kan terugkry om Osborn te oorwin en Anna Maria Marconi, Otto se liefde, te red.[111] Hierna begin Peter die verhoudings herstel wat deur Otto se arrogansie en nalatigheid beskadig is, beide as Peter Parker en Spider-Man. Hy neem ook die leisels oor van Parker Industries, 'n klein maatskappy wat Otto gestig het nadat hy by Horizon Labs weg is.[112]
Peter sterf terwyl hy teen Kindred veg. Terwyl hy dood is, onthou Peter se bewussyn die noodlottige dag aan die begin van One More Day; Kindred is gewillig om Peter te laat herleef.[113]
In The Creation of Spider-Man skryf die strokiesverhaalredakteur en -historikus Paul Kupperberg die karakter se superkragte is "nie te oorspronklik nie"; wat wel oorspronklik is, is dat hy buite sy geheime identiteit 'n "bleeksielige hoërskoolleerling" is.[114]:5 Anders as ander superhelde, sluit Spider-Man 'n "groot dosis seepopera en elemente van melodrama" in. Kupperberg voel Lee en Ditko het iets nuuts geskep in die wêreld van strokiesprente: "'n superheld met foute en alledaagse probleme". Dié idee het gelei tot 'n "strokiesprentrevolusie".[114]:6
Die onsekerheid en vrese in Marvel se strokiesboeke van die vroeë 1960's, soos The Amazing Spider-Man, The Incredible Hulk, The Fantastic Four en The X-Men, het die era van 'n nuwe soort superheld ingelui: een wat baie verskil van die selfversekerde, magtige superhelde van tevore, en dit het die publiek se siening van hulle verander.[115] Nadat 'n werklike adres in Forest Hills, Queens, as May Parker s'n verskyn het, het die inwoners van die huis baie briewe van kinders aan die superheld ontvang.[116]
Spider-Man het een van die makliks herkenbare karakters in die wêreld geword en is al gebruik om speelgoed, speletjies, graankos, lekkergoed, seep en talle ander produkte te verkoop.[117] Hy is ook al dikwels deur maatskappye as 'n gelukbringer gebruik. Toe Marvel in 1991 die eerste strokiesboekmaatskappy word op die New Yorkse Aandelemark, het The Wall Street Journal aangekondig: "Spider-Man kom na Wall Street"; reklame vir die geleentheid het ingesluit dat 'n man in 'n Spider-Man-kostuum Stan Lee na die aandelemark vergesel het.[1]:254
Sedert 1962 is honderdmiljoene strokiesboek met Spider-Man al oor die wêreld heen verkoop. Spider-Man is die wêreld se winsgewendste held.[118] In 2014 het gelisensieerde produkte wêreldwyd sowat $1,3 miljard laat inrol.[119] Dit oortref die gesamentlike syfers vir Batman, Superman en die Avengers.[118]
Toe Marvel 'n storie wou uitreik met die onmiddellike gevolge van die aanvalle op 11 September 2001, het die maatskappy die Desember 2001-uitgawe van The Amazing Spider-Man daarvoor gekies.[120] In 2006 het 'n artikel in die tydskrif BusinessWeek Spider-Man aangewys as een van die 10 intelligentste karakters in Amerikaanse strokiesverhale.[121]
"Spider-Man is die toppunt van feitlik elke superheld voor hom; hy is die held der helde. Hy het prettige en koel kragte, maar nie op 'n goddelike vlak soos dié van Thor nie. Hy is net 'n gewone ou wat probleme met meisies en geld het; dit is dus makliker om jou met hom te vereenselwig as met die pierewaaiermiljardêr Iron Man. En hy is 'n lomp tiener, nie 'n wyse volwassene soos Captain America nie. Hy is nie te warm of te koud nie, maar net reg."
In 2005 het die TV-netwerk Bravo se reeks Ultimate Super Heroes, Vixens, and Villains verklaar Spider-Man is die nommereen-superheld.[123] Die tydskrif Empire het hom vyfde geplaas op sy lys van grootste strokieshelde van alle tye,[124] en die tydskrif Wizard het Spider-Man as die derde grootste strokieskarakter op hulle webtuiste gelys.[125]
In 2011 het die webtuiste IGN hom derde geplaas op sy lys van top-100-strokiekarakters van alle tye, ná DC Comics se Superman en Batman.[122] In 2014 het IGN hom geïdentifiseer as die grootste Marvel Comics-karakter van alle tye.[126]
In 2015 is Spider-Man in 'n meningspeiling deur die webtuiste Comic Book Resources aangewys as die grootste Marvel-karakter van alle tye.[127] IGN het hom beskryf as die Jan Alleman wat gewone mense verteenwoordig, maar het ook opgemerk hy is uniek in vergelyking met ander topsuperhelde dansky sy baie gebreke as 'n superheld. Volgens dié webtuiste is hy een van die tragiesste superhelde van alle tye, maar ook "een van die snaaksste en sarkastiesste superhelde wat bestaan".[122] Empire het Spider-Man geprys vir sy humorsin en snaakse sêgoed wanneer 'n krisis hom in die gesig staar. Die webtuiste het sy ikoniese superheldhoudings as 'n "topkunstenaar se droom" beskryf.[125]
George Marston van die webtuiste Newsarama het Spider-Man se oorsprong die beste oorsprongstorie van alle tye genoem en gesê sy oorsprong "kombineer al die mees klassieke aspekte van patos, tragedie en wetenskaplike wonder in 'n perfekte mengsel vir 'n superheldoorsprong."[128]
Regte mense wat al vir hulle kloutery met Spider-Man vergelyk is, sluit die volgende in:
spiderman legacy ditko lee.