Kundinyota | Ghurabu (Corvus) |
Mwangaza unaonekana | 2.58 [1] |
Kundi la spektra | B8 III |
Paralaksi (mas) | 21.23 |
Umbali (miakanuru) | 154 |
Mwangaza halisi | -0.79 |
Masi M☉ | A: 4.2 B: 0.8 |
Mng’aro L☉ | 331 |
Majina mbadala | Gienah Corvi, 4 Corvi, BD–16 3424, FK5 457, HD 106625, HIP 59803, HR 4662, SAO 157176 |
Jinaha la Ghurabu (kwa Kiingereza na Kilatini Gienah, pia γ Gamma Corvi, kifupi: Gamma Cor, γ Cor) ni nyota angavu zaidi katika kundinyota la Ghurabu (Corvus). Iko karibu kiasi na nyota angavu ya Sumbula (Spica) katika Mashuke Mashuke (pia Nadhifa, lat. Virgo).
Jinaha la Ghurabu ilijulikana kwa mabaharia Waswahili tangu miaka mingi wakifuata njia yao baharini wakati wa usiku kwa msaada wa nyota. [2]. Walipokea jina hili kutoka kwa Waarabu wanaosema اليمن الغراب الجناح janaha-l-ghurab-al-yaman ambayo inamaanisha “ubawa wa kunguru wa kulia”[3]. Hapa Waarabu wanatumia jina la utamaduni wao ingawa walitafsiri pia jina la Kigiriki Κύων Ki-on yaani mbwa waliokuta kwa Ptolemaio katika kitabu chake cha Almagesti. Hivyo kulikuwa zamani pia kwa Kiarabu jina la "nyota" ya mbwa" kwa ajili ya Jinaha la Ghurabu. Asili ya jina la Kiarabu الشعرى ash-shi'ra inaweza kutoka kwa Kigiriki Σείριος sei-ri-os inayomaanisha "ya kuchoma, moto sana". Wagiriki walitumia jina hili pamoja na "Nyota ya Mbwa" kwa sababu wakati ule nyota hii ilianza kuonekana vema kwenye anga ya asubuhi katika siku za joto kuu. Hapo kulitokea pia jina la "siku za mbwa" (ing. dog days) kwa ajili ya kipindi cha siku za joto katika lugha mbalimbali.[4]
Katika matumizi ya kimataifa Umoja wa Kimataifa wa Astronomia ulichagua "Gienah"[5].
Gamma Corvi ni jina la Bayer. Ilhali hii ni nyota angavu zaidi katika Ghurabu ingestahili "alfa", lakini kupewa jina "gamma" ambayo ni herufi ya tatu katika Alfabeti ya Kigiriki ni mfano kwamba Bayer hakutoa herufi zake kikamilifu kufuatana na mwangaza halisi.
Jinaha la Ghurabu - Gienah ina mwangaza unaoonekana wa mag 2.58 na mwangaza halisi ni -0.79. Umbali wake na Dunia ni miakanuru 154.[6].
Jinaha la Ghurabu si nyota moja tu bali nyota maradufu. Kuwepo kwa nyota ya pili isiyoonekana kwenye darubini kulithibitishwa kwa njia ya utafiti wa spektra yake.
Nyota kuu ni jitu buluu yenye jotoridi kubwa, takriban nyuzi 12,000 usoni wake.