Farauni era lu titulu dû re di l'anticu Eggittu. Li farauna rignarru nti l'anticu Eggittu dû 3150 a.C. circa nzinu all'annissioni rumana doppu chi Antoniu persi la guerra contra Ottavianu Augustu, ntô 31 a.C.
Li farauna eranu puru l'auturità riliggiusa suprema, e èranu iddi stissi cunsidirati comu dèi.
Pi stu mutivu nti la riliggiuni egizziana avèvanu dirittu quannu murèvanu a na cirimonia di sipultura assai fastusa, chi avìa comu scopu di assicurari la vita eterna nun sulu ô farauni ma a tuttu lu pòpulu eggizzianu. Certi farauna si fìciru custruiri munumenta giganteschi n forma di piràmidi, chi doppu quasi cincu mila anni si pònnu ancora taliari, e chi rapprisentau ancora òggi l'attrazzioni turistica principali, n Eggittu.
Ci s'àppiru ntra trintina di dinastìi di farauna nti la storia di l'anticu Eggittu, l'ùrtima di quali fu la dinastìa dî tulumei, dû capustìpiti grecu chi cunquistau l'Eggittu 'n sèquitu ê cunquisti di Alissandru Magnu.