Enzu Biagi, cèlibbri jurnalista italianu, nasciu a Lizzanu 'n Belvedere, nu paisi di l'Appinninu toscu-emilianu 'n pruvincia di Bologna, lu 9 di austu dô 1920 e muriu a Milanu lu 6 di nuvèmmiru dû 2007.
Figghiu di na famigghia puviredda, accumincia la carrera giurnalistica a diciott'anni ntô giurnali "Resto del Carlino", senza pi chissu finiri li studî. A 21 anni addiventa prufissionista, appoi veni arrichiamatu a l'armi e l'8 sittèmmiru 1943, pi non adiriri â Ripùbbrica di Salò, si junci chê gruppi partiggiani. Lu 21 aprili dû 1945 trasi a Bologna chê truppi alliati e cumùnica dê micròfuni dâ "Pwb" la fini dâ guerra.
Ntô 1952 accumincia a cullabburari cô sittimanali "Època", unni addiventa diritturi e nta st'anni accumincia macari la sò cullaborazzioni câ "Rai". Ntô 1961 veni chiamatu a dirìggiri lu Tg e l'annu dopu funna lu primu rotucalcu tilivisivu. Lassa la dirizzioni dô Tg e passa a "La Stampa" comu nviatu unni arresta pi quarchi deci anni; appoi metti la sò frimma sùpira "La Ripubbrica", "Lu Curriere della sera" e "Panurama". Ntô mentri cuntinua a cullabburari câ Rai unni duna vita a numirusi trasmissioni: Dicunu di lei, Pruibbitu, Film dossier, Linia diretta, Spot, Lu casu (pi dìrini sulu quarc'una); nta ssi trasmissioni eppi cuntatti e fu a culloquiu chê granni pirsunaggi dô sèculu.
Dô 1991 duna vita a nu prugramma ogni annu: lu sò travagghiu pi la radiutilivisioni taliana pùbbrica finisci lu 31 maiu dû 2002 cu l'ùrtima puntata dô prugramma "Il Fatto", appuntamentu di ogni jornu di granni ascutu 'n onda pi ortri 700 puntati dô 1995. La trasmissioni finisci dopu li pulèmichi lejati a l'accusi di fazziusità ca ci vènunu mannati dô prisidenti dô cunsigghiu Silviu Berlusconi pi l'intirvista a Roberto Benigni. Nzinu ô 2007 li sò apparizziuni tilivisivi foru sulu dui sùpira "Raitri", comu òspiti a "Chi tempu ca fa" nti Fabbiu Fazio e a "Primu pianu". Appoi torna pi l'ùrtima vota a aviri na trasmissioni ntâ Rai ntô 2007, ca havi lu stissu tìtulu dâ sò prima trasmissioni di quannu acuminciau: Rt-Rotocalcu telivisivu. E' auturi di na grannissima bibbriografìa di caràttiri stòricu e documentaristicu, ma macari tra mimoria e narrazzioni, ca cumprenni ortri 80 tìtuli.