«Still Breathing» Song av Samanta Tīna | ||
Land | Latvia | |
Språk | Engelsk | |
Utgjeve | 28. november 2019 | |
Sjanger | Elektropop, EDM, dubstep, trap | |
Lengd | 03:06 | |
Tekstforfattar | Aminata Savadogo | |
Låtskrivar(ar) | Aminata Savadogo, Samanta Tīna |
---|
«Still Breathing» (norsk 'pustar framleis') er ein engelskspråkleg elektropopsong frå 2020 med den latviske songaren Samanta Tīna. Ho skreiv songen saman med Aminata Savadogo. «Still Breathing» vann den latviske songtevlinga Supernova 2020 og skulle ha vore det latviske bidraget til Eurovision Song Contest 2020 i Rotterdam i Nederland, men 18. mars 2020 avlyste EBU Eurovision Song Contest på grunn av koronaviruspandemien i Europa vinteren 2020.[1]
«Still Breathing» vart spela inn 28. november 2019,[2] og var eit av 126 bidrag som vart sendt inn til den latviske songtevlinga Supernova 2020.[3] Supernova vert arrangert av kringkastaren LTV, og vinnaren får representere Latvia i Eurovision Song Contest. Songen var ein av 26 som vart plukka ut til tevlinga, og han vart offentleggjord 9. januar 2020.[4]
I finalen av Supernova 8. februar 2020 fekk «Still Breathing» flest røyster av sjåarane og vann tevlinga.[5] «Still Breathing» vart dimed det latviske bidraget til Eurovision Song Contest 2020.[6]
I januar 2020 vart Latvia trekt ut til å delta i den andre semifinalen av Eurovision Song Contest, som skulle ha vore arrangert torsdag 14. mai i Rotterdam Ahoy. På grunn av koronavirusutbrotet i Europa vinteren 2020 vedtok EBU å avlyse Eurovision Song Contest for å hindra spreiing av infeksjonssjukdomen covid-19.[7] Songen fekk dimed aldri delteke i Eurovision Song Contest.