Stein Kollshaugen | |
Statsborgarskap | Noreg |
Fødd | 16. februar 1956 (68 år) Gjøvik kommune |
Yrke | fotballspelar |
Høgd | 178 centimeter |
Stein Kollshaugen (fødd 16. februar 1956) er ein norsk tidlegare fotballspelar frå Gjøvik som spelte på Raufoss, Moss og Hamarkameratene. Han vart norsk meister med Moss Fotballklubb i 1983 og spelte 18 landskampar i tida 1979-84.
Kollshaugen debuterte på Raufoss Idrettslag i 1974 då laget vart sist i 1. divisjon. Dei neste fire sesongane var han årleg toppskårar for klubben i 2. divisjon. Før 1979-sesongen melde han overgang til Moss. I sin fyrste sesong i Moss vart han toppskårar i 1. divisjon med 15 mål, saman med Odd Iversen, og vann sølv i serien. Kollshaugen skåra det fyrste målet då Moss i 1983 vann cupfinalen med 2-0 over Vålerenga på Ullevaal stadion i Oslo.
Etter seks sesongar i Moss tok han våren 1985 plass i angrepet til andredivisjons-laget Hamarkameratene. Laget vann A-avdelinga og rykte opp i 1. divisjon, der det vart verande i to sesongar. Kollshaugen var så toppskårar for Hamar-klubben både i 1988 og 1989. Han la opp etter 1990-sesongen, etter at laget for tredje året på rad mislukkast i å rykke opp i toppdivisjonen.
Kollshaugen fekk sin debut på det norske OL-landslaget hausten 1979. I sin andre landskamp var han med då Noreg kvalifiserte seg til Moskva-OL med siger 1-0 over det vesttyske amatørlandslaget i Baunatal. I 1980-sesongen deltok han i tre landskampar og skåra både mot Danmark og mot Island.
Etter eit par års fråvære frå landslaget spelte han han heile 11 landskampar i 1983. Han skåra fem mål i OL-kvalifiseringskampar, dei to siste då Noreg slo Finland 4-2 den 26. oktober 1983 på hans dåverande heimebane, Melløs i Moss. Kollshaugen var med i troppen som deltok i Sommar-OL 1984 i Los Angeles. Han var der med i startellevaren mot Frankrike, hans 18. og siste landskamp. Til saman signerte han sju landslagsmål.