Det er vanleg innan new age å visa til mytologiske eigenskapar ved jorda, månen og verdsrommet; omgrepet new age viser til det astrologiske omgrepet tidsalderen til Vassmannen.[1] Den nye tida inneber at «alle gamle ideologiar og religionar i den noverande tidsalderen til Fiskane vil ha utspelt si rolle».[2]
New age (frå engelsk; ny tidsalder) er ei religiøs strøyming som har utvikla seg i den vestlege verda sidan 1970. New age har ein desentralisert struktur utan ein samlande organisasjon, einskapleg ideologi eller faste doktrinar; og i vid forstand omfattar New age «eit stort tal rørsler og organisasjonar med bakgrunn i ulike former for terapi, yoga, astrologi, okkultisme, sjamanisme og medvitsutvidande teknikkar». Samtidig peiker omgrepet gjerne på «ei generell livshaldning, eit heilskapleg verdsbilete eller ei terapiform, der desse elementa inngår i ulike kombinasjonar».[3]