FIDE-meister i sjakk (FM) (FIDE Master på engelsk) er ein sjakktittel som blir delt ut av Verdssjakkforbundet FIDE til sjakkspelarar, vanlegvis fordi desse har oppnådd FIDE-rating på 2300 eller meir på ei offisiell FIDE ratingliste.

Tittelen rangerer under Stormeister i sjakk og Internasjonal Meister i sjakk, men over Kandidatmeister (CM). Tittelen er livsvarig, og er open for både kvinner og menn.

Ein blir også tildelt tittelen etter følgjande resultat i sjakkturneringar:^[1]

• 66.66% skåre eller betre over 9 parti i ein Sjakkolympiade (lag-VM i sjakk)
• 66.66% skåre eller betre over 7 parti i VM eller kontinentalcup for lag
• Delt førsteplass (opp til 3 stk) i VM for Ungdom i klassane U-16/14/12/10
• Sølvmedalje i VM for blinde, døve eller handikappa (dette er tre ulike turneringar)
• Delt førsteplass (opp til 3 stk) i U-20 utgåva av VM for blinde, døve eller handikappa
• Delt førsteplass (opp til 3 stk) i kontinentalmeisterskap, den søraustasiatiske eller arabiske meisterskapen
• 50% eller betre over 9 parti i soneturnering i sjakk.
• Gullmedalje i VM for amatørar

Det var per 1. april 2021 8242 sjakkspelarar med tittelen FIDE-meister.^[2]

Per same dato, 1. april 2021 var det 68 norske sjakkspelarar som har tittelen FIDE-meister.[1] Av desse er 53 aktive.[2]