Willem Andries Wilmink (Tweants: Willem Wilmink) (Eanske, 25 oktober 1936 - Eanske, 2 augustus 2003) was nen Tweantsen dichter, skriewer en zänger.
Wilmink wör in 1936 geboorn an de Javastroate in Eanske in n sosjalistiese femilie. Zie vaa was prokurasiehoolder in de textiel. In 1954 haaldn'e zin gymnasiumexaamn, woernoa at'e Neerlaands studeern dee an de Universiteit van Amsterdam. Noa at'e zin kandidoatsbewies har ekreegn gung'e ook nog Geskiedenisse studeern. Oonderwiel skreef'e zinne eerste gedichtn al. Hee bracht zin woark oet in n "Almanak van de vereniging USA" en dee tekstn skriewn vuur t studeantntoneel "La Pie Qui Chante" (n Zingden Eakster). In 1960, t leste studiejoar, wör'e leraar an t Vossius Gymnasium in Amsterdam.
Van 1961 töt 1978 deed'e les geewn in Moderne Letterkeunde an t Instituut voor Neerlandistiek van n Universiteit van Amsterdam. Hee har gedoernde zinne jeugnd trekzakles ehad, en treu doarmet op tiedns de feestoawnde van zinne vakgroep, woerbie at'e smartlapn zung, of bewoarkings van Middeleewse leedern. Hee zat "Beatries" umme van t Middel-Hollaands noar t Moderne Hollaands. In 1988 promoveerdn'e an de Kattolieke Universiteit Broabaant met n stuk oawer t dichwoark van Hendrik de Vries. Wieters steund'e bekeand um zin woark as literatuurvertaler, met oonder mear woark van Emily Dickinson en W.H. Auden. Met hulpe van aandere Neerlaands-geleardn zat'e t bekeande verhaal van n Iersn heligen Brendaan umme. Hee skreef n antal beskouwiges oawer de Middeleewn, dee at'e beundeln dee met as naamn Mijn Middeleeuwen. Ook skreef'e geskiedkeundige artikels oawer kattedroaln, en de geskiedenisse en herkomst van t Belgiese beer.
Vanof 1965 skreef'e gedichtn, opsteln, leedjes en verhaaln vuur de literatuurblaadn "Tirade", "Maatstaf" en "De Revisor". In 1966 begun zin literatuurloopbaan met "Brief van een Verkademeisje". Van 1968 töt 1970 was'e dichtkeunstkritieker vuur dagblad "De Tijd" en van 1971 töt 1977 was'e redakteur van t blad "Spektator".
Met Hans Dorrestijn, Karel Eykman, Ries Moonen, Fetze Pijlman en Jan Riem vörmdn'e in 1970 ne groep den at skreef vuur verskeaidene tellevisieprogrammaas zo as "Het Klokhuis", "De Film van Ome Willem", "Sesamstraat", "J.J. De Bom voorheen De Kindervriend" en "Kinderen voor kinderen". Ook skreef'e völle vuur musicals. In 1978 richtn'e zik volledig op t skriewn van teksn en hee gung in Kapelle an n Iessel wonn. töt an det'e oet de tied köm skreef Wilmink op ne tiepmesiene want an n komputer wol'e neet an. Vanof 1979 deed'e ook n antal joarn lesgeewn an de kleainkeunstakademie van Amsterdam
Met zinne eegne begeleaidingsgroep Quasimodo deed'e in de 90er joarn völle optreedn as zänger woerbie at'e ook trekzak speuldn. Zinne leedjes beent ook völle gebroekt duur aandern, zo as Herman van Veen (Hilversum 3, De bom valt nooit), Wieteke van Dort (Arm Den Haag), Joost Prinsen (Frekie) en kabaretgroep Don Quishocking (De Oude School)". Harry Bannink en Frank Deiman hebt bie völle van zinne tekstn muziek bie bedacht.
Wilmink hef völ Keenderbeuke skreewn. Earder skreef'e aait mear vuur volwasn leu, mear later richtn'e zik al mear op wichter. Hee skreef gedichtn en verhaaln vuur volwasn leu en vuur wichter, tekstn vuur kabaret en tellevisie, nen koers oawer wo a'j gedichtn skriewn munn, bewoarkings van oolde tekstn zo as De reaize van Sunte-Brendaan oet t 12de joarhonderd, en hee verkloardn t Wilhelmus. Hee zat verskeaidene tekstn, gedichtn en beuke umme oet t Duuts, Engels, Fraansk en t Zuud-Afrikaans.
Wilmink was onmeundig wies met Tweante. Hee wör dr geboorn en is dr oet de tied ekömn. Hee woondn nen langn zet in Hollaand, mear op lateren leaftied wol'e gearne wierumme. Hee begun ook in t Tweants te skriewn. In t kupersdieks, zo as'e det zelf neumdn. Dee beundeln'e later in t woark Heftan tattat! (24 gedichtn in t Stadsplat):
Proza
Poëzie
Poëzie vuur wichter
Proza vuur wichter
Opsteln