Sudan Selatan atau sacaro rasmi Republik Sudan Selatan adolah sabuah nagara takuruang daratan di Afrika Timur.[1] Nagara ko babatehan jo Ethiopia di timur, Kenya, Uganda, jo Republik Demokratik Kongo di selatan, Sudan di utara, sarato Republik Afrika Tangah di barat. Nagara ko marupokan nagara tamudo di dunia, dimano manyatoan bapisah dari Sudan pado 9 Juli 2011.[2] Ibu kota jo kota tagadangnyo iolah Juba.
Pamarentahan Sudan Selatan manggunoan sistem presidensial, dimano Presiden adolah kapalo nagara jo kapalo pamarentahan. Badan legislatifnyo dipacik dek Badan Legislatif Nasional nan tadiri dari Majelis Legislatif Nasional jo Dewan Nagara.[3] Pangadilan independen dari eksekutif jo legislatif nan dipimpin dek Mahkamah Aguang. Manuruik indeks Demokrasi V-Dem tahun 2023, Sudan Selatan barado di paringkek ka-3 demokrasi elektoral tarandah di Afrika.[4]
Pado tahun 2024, panduduaknyo dipakiroan hampia 12,7 juta jiwa,[5] maningkek dari hasia sensus 2008, sabalum kamerdekaan, nan bajumlah 8,26 juta jiwa.[6][7] Kalompok etnis utamo iolah 40% Dinka, 20% Nuer, 10% Azande, sarato Shilluk jo Bari.[8] Panduduaknyo maanuik agamo Kristen, Islam, jo agamo tradisional Afrika.[9][10][11]