Ismail Lengah | |
---|---|
Lahia | |
Kabangsaan | ![]() |
Karojo | Tantara |
Dikana dek | Pajuang kamardekaan Indonesia, pamimpin PRRI |
Kolonel Ismail Lengah adolah surang tokoh tantara, pajuang kamardekaan Indonesia sarato tokoh Pamarentahan Revolusioner Republik Indonesia (PRRI). Pado taun 1956 Ismail Lengah manjabat sabagai Panglimo Komando Divisi IX Banteng sabalun malatuihnyo paristiwa PRRI. Komando Divisi IX Banteng adolah salah satu divisi dalam Angkatan Parang Republik Indonesia (APRI) nan mambawahi teritorial Sumatera Tangah nan maliputi provinsi Sumatera Barat, Riau, Kapulauan Riau jo Jambi kini. Salah satu pasukannyo, iyolah Resimen 6 Divisi IX Banteng dianggap sabagai pasukan tabaiak di Sumatera. Ismail Lengah manjabat posisi panglimo jo pangkaik Kolonel katiko itu.[1]
Sabalun jo sasudah kamardekaan Ismail Lengah salalu aktif dalam pajuangan mausia panjajah. Baliau pernah pulo mamimpin suatu rapek rahasio di Padang nan diadoan pado tanggal 18 Agustus 1945 nan kudian balanjuik di tanggal 25 Agustus 1945 lalu mandirian Balai Panarangan Pamuda Indonesia (BPPI) nan dikatuai langsuang dek baliau. Kalanjuik-an dari itu pado tanggal 31 Agustus, tabantuaklah Komite Nasional Indonesia (KNI) Daerah Sumatera Tangah nan dikatuai dek Muhammad Sjafei.
Pado bulan Januari 1946 baliau diangkek manjadi Direktur Sakola Pandidikan Opsir nan baru didirian di Bukittinggi, katiko itu baliau bapangkek letnan kolonel. Pado bulan Juli 1946, Ismail Lengah diangkek manjadi Kapalo Seksi Pasanjatoan Markas Umum Komandemen Sumatera. Pado taun 1956 jo pangkek kolonel baliau manjabat sabagai Panglimo Komando Divisi IX Banteng nan mambawahi Sumatera Tangah.
Pado 20 November 1956 di Padang, Ismail Lengah mambantuak Dewan Banteng nan katuanyo Letnan Kolonel Ahmad Husein nan katiko itu manjabat sabagai Kumandan Resimen IV Tantara Teritorium (TT) I di Padang. Pambantuak-an Dewan Banteng di Sumatera Tangah akhianyo diikuti dek daerah-daerah lain sarupo pambantuak-an Dewan Gajah di Sumatera Utara dek Kolonel Maludin Simbolon jo Dewan Garuda di Sumatera Salatan dek Kolonel Barlian, sarato Dewan Manguni di Sulawesi Utara dek Letnan Kolonel Ventje Sumual. Pambantuak-an Dewan-Dewan ko didasari dek katidakpuehan nan dirasokan daerah-daerah di lua pulau Jawa.
Sasudah rapek di Sungai Dareh, Sumatera Tangah pado tanggal 9 Januari 1958, akhianyo Ahmad Husein mambantuak Pamarentahan Revolusioner Republik Indonesia (PRRI) pado tanggal 15 Februari 1958 sarato maangkek Syafruddin Prawiranegara sabagai Pardana Mantari barikuik kabinetnyo. Samantaro itu di Sulawesi Utara, Letnan Kolonel D.J. Somba maikutinyo jo mambantuak Garakan Piagam Pajuangan Semesta (Permesta).
Tuntutan Dewan-Dewan itu tantang otonomi, panyarahan mandat Pardana Mantari Djuanda kapado Mohammad Hatta dan Hamengku Buwono IX, pambantuak-an zaken kabinet jo tuntutan supayo Presiden baliak sabagai Presiden Konstitusional sarato babarapo tuntutan lainnyo indak dipanuahi dek pamarentah pusek. Sasudah malalui babarapo parundiangan nan indak mahasilan kasapakatan ditangah situasi nan managangan akhianyo pamarentah mangirim pasukan dalam jumlah gadang untuak mambungkam aspirasi daerah-daerah tu. Tajadilah parang sudaro naan cukuik banyak mamakan korban anak bangso.