Ecclesia Orthodoxe |
---|
instantia de: denomination christian, historic church[*] |
parte de: Eastern Orthodoxy[*] |
![]() |
|
data de creation: 1054 |
Commons: Eastern Orthodox Church |
Le Ecclesia Orthodoxe es un communion de corpores ecclesiastic distincte e autonome, con un mesme theologia. Iste ecclesia se considera como le Un, Sancte, Catholic e Apostolic Ecclesia fundate per Jesus Christo verso duo millennios passato. Como celles de altere ecclesias,[1] le episcopos orthodoxe tracia lor succession apostolic al apostolos original de Jesus. Le Ecclesia Orthodoxe tracia su disveloppamento trans le ecclesias byzantin e roman usque le primitive ecclesia establite per Paulo de Tarso e le apostolos. Illo clama practicar le traditiones original e ancian del ecclesia. Illo es distincte del Ecclesia Catholic depois le schisma de 1054.
Ecclesias orthodoxe son le principal representantes del christianismo in multe paises, super toto in Europa del Est e le Proxime Oriente. Le maxime ecclesia orthodoxe es le Ecclesia Orthodoxe Russe;[2] le plus alte, le Patriarchato Ecumenic de Constantinopole; le plus vetere, le patriarchatos de Constantinopole, Alexandria, Antiochia e Jerusalem. Le ecclesias orthodoxe ha multo influentiate culturas grec e slave, e ha essite culturalmente influentiate per illos. Il ha in total circa 300 milliones de adherentes orthodoxe christian in le mundo.
Le texto biblic utilisate per le orthodoxos include le Septuaginta e le Nove Testamento; ambes son scripte in greco. Iste texto include le septe libros deuterocanonic acceptate per catholicos (ma generalmente recusate per protestantes) e un pauc de textos curte non acceptate per catholicos ni protestantes. Sanctos, super toto Maria le «theotokos» (le deipare), son multo venerate. Domos orthodoxe ha sovente multe icones que depinge Jesus e/o le sanctos.
Ben que on confunde sovente le Ecclesia Orthodoxe e le antique ecclesias del Proxime Oriente (ecclesias copte, armenie, ethiope...), istes son duo distincte communiones. In facto, le Ecclesia Orthodoxe es theologicamente plus compatibile con le Ecclesia Catholic que con le alteres, pro que le ecclesias del Proxime Oriente non ha jammais acceptate le Concilio de Chalcedon (451) ni subsequente concilios ecumenic; iste antique ecclesias esseva dunque considerate como anathematic per Orthodoxia, e non solmente schismatic como le Ecclesia Catholic.
Ecclesias orthodoxe usa le rito byzantin in varie linguas (greco, slavo ecclesiastic, romaniano etc.). Iste rito se distingue per le uso de levatura in le preparation del eucharisto, parochos qui pote mariar se, un rolo prominente pro diaconos in servicios, e le importantia perdurante del monasticismo. Le majoritate de servicios orthodoxe es cantate, non parlate. Traditionalmente, le congregantes sta durante le servicio integre, e un iconostase separa le sanctuario del resto del ecclesia. Le fideles se inclina frequentemente e pote displaciar se liberemente durante le servicios.
Le sequente ecclesias se recognosce omnes como constituentes del communion orthodoxe. Le sede de cata provincia es notate inter parentheses.
Il existe altere ecclesias schismatic de tradition e theologia orthodoxe. Cellos plus magne include le Ecclesia Orthodoxe Ukrainian Autocephalic, le Ecclesia Orthodoxe Ukrainian, le Vetule Credentes, le Ecclesia Orthodoxe Russe in America e altere «Vetule Calendaristas» (proponentes del calendario julian).
Dunque, in plure locos, il ha un multiplicitate de jurisdictiones ecclesiastic orthodoxe. Isto es notabilemente le caso in America del Nord (le Statos Unite e Canada) e altere paises con communitates de immigrantes orthodoxe (como Francia, Grande Britannia, Germania, etc.), ma anque in Ukraina, Moldavia, Estonia, etc. Al exception del Vetule Credentes e de altere gruppos plus parve, le differentias inter iste ecclesias non son de character theologic, ma ethnic o mesmo politic.