O monte Xiabre é unha montaña galega, situada entre os concellos de Caldas de Reis, Catoira e Vilagarcía de Arousa. Acada unha altitude de 641 metros no punto coñecido como Alto da Meda.
Ten abundante vexetación, debido a ter unhas precipitacións anuais duns 1.500 mm. É o máis alto dunha serie de cumios da mesma serra, como Agudelo (413 m), Lobeira (290 m), A Xaiba ou Monte do Fento (280 m) ou o Pousadoiro (220 m).
Dende a aba oeste obsérvase Vilagarcía de Arousa e a ría de Arousa.
A zona de Fontefría é unha pradeira con regatos, que conta cunha área recreativa con mesas.
Nos últimos anos sufriu moitos incendios forestais que devastaron decenas de hectáreas. Un dos incendios máis importantes tivo lugar o 23 de agosto de 2005 que arrasou moitas zonas da montaña.
Este monte sufriu tamén, como outras zonas, a vaga de incendios forestais de 2006 en Galicia, cando en Xiabre arderon centos de hectáreas que provocaron unha fumareda de máis de 5 quilómetros de radio.
No pico da Gaiba atópase un poboado castrexo aparentemente ben conservado. En diversos chans, como a denominada Rosa de Parroibas, localizáronse diversos túmulos funerarios de probable cronoloxía neolítica. Un destes túmulos, o máis grande, está nun esporón chamado Fonte Loureiro. Os veciños de Castrogudín contan diversas lendas que unen o castro da Xaiba co pobo a través dunha gabia (de onde viría o nome). Tamén sinalan a existencia dun túnel ou gabia dende Fonte Loureiro.
En 2007 a prensa publicou a localización de petróglifos neste monte.
![]() |
Commons ten máis contidos multimedia sobre: Monte Xiabre |