O billar é un deporte que se practica nunha mesa con taboleiro de lousa tapizada, sobre o cal pode rodar un número variable de bólas, confinadas sobre a súa superficie mediante taboleiros perimetrais recubertos na parte de contacto coas bólas por bandas de material elástico. Tivo a carta olímpica para as olimpíadas do 2004, aínda que non chegou a ser incluído nelas.
O billar, que dende comezos do século XVI constitúe un verdadeiro e luxoso moble destinado ao entretemento doméstico, derívase dos diferentes xogos de bólas que estiveron en uso dende tempos remotos. Parece ser de invención francesa, xa usado, aínda que de xeito primitivo, nos últimos séculos da Idade Media. En canto ao valor artístico da mesa de billar, foi evolucionando, seguindo as variantes de estilo dende o Renacemento e os caprichos do gusto, ao igual que calquera moble de salón ou gabinete. O nome venlle dos tacos ou punteiros que serven para empurrar as bolas de marfil, os cales se chamaban billard en Francia. Deles, pasou o nome a todo o xogo e de aquí á mesa que serve para o mesmo, que sempre ten que ser robusta e pesada para evitar que se curve ou perda o equilibrio.