Elisa Herrero Uceda | ||
---|---|---|
![]() | ||
Enhormación pressonal | ||
Nacencia |
7 de noviembre de 1957 Ceclavín (España) | |
Muerti |
21 de mayo de 2020 (62 años) Madrid (España) | |
Nacionalidá | Española | |
Educación | ||
Educau en |
| |
Enhormación profissional | ||
Oficiu | Escrevienti | |
Elisa Herrero Uceda (Ceclavín, Caçris, 7 de noviembri del 1957 - Mairil, 21 de mayu del 2020) hue una escreviora, dotora, científica, inginiera inhormática i relatora de puesía. Defendeora comprometía dela naturaleza, la conservancia delos saberis tradicionais dela coltura estremeña i la su luenga estremeña.
Dotora en Biología pola Nuversidá Utónoma de Mairil, hizu'l su posdotoral en el Medical Research Council de Cambridge n'Ingalaterra. Tamién hue inginiera en inhormática pola Nuversidá Politénica de Mairil, peru al mesmu tiempu, amanti de la su tierra, enjamás olvió los saberis tradicionais i las querencias pol campu i la hesa, refrexándulus enos sus escritus.[1]
El 31 de mayu del 2014 hormó parti del encuentru i la corrobra d'escrevioris estremeñus veníus d'endrentu i d'ahuera dela Estremaúra, nel su pueblu de nacencia, Ceclavín (Caçris).[2][3][4][5] Participó i calavoró nel encuentru anual dela "Semana delas Letras dela Complutensi".
Participó enos encuentrus líricus que dava juntu al su ermanu, tamién escreviol i apregonaol, Miguel Herrero Uceda. Comprometíus dambus i dos cona conservación delos saberis tradicionais dela coltura estremeña.[6]
Devíu a esta concencia escrevian los sus librus sobri la coltura roal dela Estremaúra, i dos librus de relatus, escritus n'estremeñu, Ceborrinchu i Mamaeña.
Era ermana tamién del pintol Antonio José Herrero Uceda, con quien calavorava enas sus esposicionis y del escribiol, naturalista y divulgaol Miguel Herrero Uceda.[7]
Hue dotora en Biología pola Nuversidá Utónoma de Mairil. Nel Medical Research Council de Cambridge, analizó la proteína acetilcolinesterasa, un componenti llavi pa lucheal ena contra l'Alzheimer. Á pubricau muchus artícalus enas revistas entrenacionalis de vestigación sobri la neurocencia.
Hue tamién inginiera en inhormática pola Nuversidá Politénica de Mairil.[8]
Comu omenagi póstumu pol su defendimientu del mundu coltural delo estremeñu i la su luenga, l'OSCEC col sostribu dela Junta d'Estremaúra, las Deputacionis i otrus organismus estremeñus, estituyó nel 2021 el Día delas Letras Estremeñas. Esti día, comu enas celebracionis en Galicia, Canarias i Asturies a tentu las sus luengas, se hazi omenagi a aquellas pessonas que destacan pol su criaeru literariu en anguna delas luengas estremeñas, comu sonin el estremeñu, a fala o el portugués raianu.[11]
La primel edición d'esti Día se dedicó a Elisa i se celebró en Ceclavín, el su puebru de nacencia, que primeramenti estava praneau pal 7 de noviembri del 2020, el dia dela su nacencia, peru por mé del andanciu se adió pal 22 de mayu del 2021, nel primel aniversariu dela su muerti. Se hizun unas atividais al reol dela figura dela escreviora i se descubrió un monicli con una puesía suya n'estremeñu, qu'está nuna praça d'esta localidá.[12]