Super Smash Bros. Melee | |
---|---|
Disvolvo | HAL Laboratory |
Eldoninto | Nintendo |
Direktoro | Masahiro Sakurai |
Produktoro | Mijamoto Ŝigeru |
Serio | Super Smash Bros. |
Platformo | Nintendo GameCube |
Ĝenro | batala videoludo |
Ludomaniero | multludista videoludo |
PEGI-klasifiko | PEGI 3 |
ESRB-klasifiko | Teen (Adoleskuloj) |
Super Smash Bros. Melee estas interseria batala videoludo kreita de HAL Laboratory kaj publikigita de Nintendo por la videoludilo GameCube. Ĝi estas la dua ludo de la ludserio Super Smash Bros. Ĝi sekvas la ludon Super Smash Bros por la videoludilo Nintendo 64. Ĝi unue estis lanĉita en Japanujo en novembro 2001, kaj poste en aliaj landoj.
En la ludo troviĝas multaj roluloj, kiuj venas de diversaj ludserioj de Nintendo kiel Super Mario Bros., The Legend of Zelda, Star Fox, kaj Pokemon. Melee enhavas ĉiujn ludeblajn rolulojn de la antaŭa ludo por Nintendo 64, sed ankaŭ aldonas novajn rolulojn el aliaj ludserioj, kiel Fire Emblem, kiu neniam aperis ekster Japanujo, kaj Melee helpis popularigi ĝin. La ludlokoj kaj la ludmanieroj de la ludo similas al tiuj, de la popularaj ludoj eldonitaj de Nintendo.[1]
La ludmaniero de Melee estas tre malkutima kompare al aliaj luktoludoj. Anstataŭ uzi linion por reprezenti restantajn vivpoentojn, Melee uzas elcentojn. Tiuj elcentoj grandiĝas kiam rolulo ricevas batojn, sed tiu nombro povas senfine grandiĝi. Granda elcento de damaĝoj ne kaŭzas la malvenkon de la rolulo, sed pli igas ĝin pli probabla.[2][3]. Melee uzas la ludmanieron, kiu estis kreita por la unua ludo de la serio, kaj aldonas al ĝi novajn ludmanierojn, rolulojn kaj ludlokojn. Pro la populareco de ĝia plurpersona ludmaniero, Melee estas multe uzata kadre de elektronikaj sportoj, kie ludantoj ludas unu kontraŭ la alia ĝis restas unu fina venkinto de la videoluda turniro.
La ludo estis tre laŭdata de videoludantoj kaj videoludaj ĵurnalistoj. Ĝi ricevis multajn premiojn kaj favorajn agnoskojn. Ĝi estis multe vendita je la oficiala lanĉo.[4][5] kaj estas la plej vendita videoludo por Nintendo GameCube, per pli ol 7 milionoj luddiskoj venditaj antaŭ la fino de marto 2008.
Kiel la antaŭaj ludoj de la serio, Super Smash Bros. Melee malsimilas al la kutimaj luktaj ludoj, ĉar la celo estas puŝi la aliajn rolulojn ekster la limoj de la ludloko.[6] La plimulto de la atakoj en la ludo povas doni damaĝelcentojn. Ju pli rolulo havas damaĝelcentojn, des pli ĝi estos puŝita for kiam ĝi ricevos novan atakon.[3] Tio signifas ke frapi rolulon helpas forpuŝi ĝin de la ludloko, sed ankaŭ ke tio ne estas nepre bezonata por venki ĝin. La alia rolulo povas ankaŭ simple fali de la ludloko kaj perdi vivon (ankaŭ nomata "stock" angle).[7] Malsimile al multaj luktaj ludoj kie oni povas fari specialajn atakojn uzante plurajn butononojn kune, oni povas fari la plejmulton de la atakoj de Super Smash Bros. Melee rekte per unu butono kaj unu direkto.[8]
Dum bataloj, aĵoj ligitaj al ludoj aŭ ludiloj de Nintendo povas aperi en la ludloko.[9] Tiuj aĵoj havas diversajn funkciojn kiel damaĝi aŭ resanigi rolulon.[9] Krom tio, la plejmulto de la ludlokoj temas pri ludo kiu aperis en videoludilo de Nintendo. Ofte roluloj povas interagi kun la ludloko.[1] Kvankam la ludlokoj aspektas 3-dimensie, eblas movigi la rolulojn nur laŭ 2 dimensioj. Ne ĉiuj ludlokoj estas disponeblaj de la komenco de la ludo. Multaj devas esti malkovritaj per plenumado de apartaj kondiĉoj.[1] Simile, multaj roluloj, trofeoj kaj muzikoj devas esti malŝlositaj esplorante la ludon.