Marlene Dietrich (* 27. decembra1901 w Schönebergu (źinsa źěl Barlinja); † 6. maja1992 w Parisu; pšawje Marie Magdalene Dietrich) jo była nimski roźona grajaŕka a spiwaŕka, kenž jo w lěśe 1939 amerikańske staśaństwo pśiwzeła.
Wóna jo jadna z njewjele nimskorěcnych wuměłcow, kótarež su teke mjazynarodnu sławu zdobyli. Typiski za nju su byli jeje dłujkej noze, jeje dłymoki, erotiski głos a woblaki ze zecami, kenž su pón w lětach 30. nastali modiske za žeńske.
Marlene Dietrich jo zachopiła swóju karieru ako źiwadłownica a w nimych filmach w tak pomjenjonych złośanych dwaźastych w Barlinju. Jeje zlět k mjazynarodnej sławje jo se zachopił w 1930 z głowneju rolu w filmje Der blaue Engel režisera Josefa von Sternberga. Gromaźe z Sternbergom jo pójšła w 1930 do USA, źož su wucynili dramu Marokko z Garym Cooperom, za kótaruž jo nominaciju za Oscara dobyła. Z filmami ako Shanghai-Express (1932) a Der große Bluff (1939) wóna jo se etablěrowała ako prědna nimska filmowa gwězda w Hollywooźe.
Za cas nacionalsocializma w Nimskej wóna jo se wopěrała, až by NS-Propaganźe pomagaś. Město togo wóna jo se za cas 2. swětoweje wójny angažěrowała pśi wótwardowanju amerikańskich wójskow. W lěśe 1947 jo jej prezident USA Harry Truman medalju lichoty pósćił.