U 4 di ferraghju hè u 35èsimu ghjornu di l'annu in u calendàriu gregurianu. Dunque, rèstanu 330 ghjorni à a fine di l'annu (331 sì hè bisestile).
Celebrazioni
Santi
Santa Verònica
L'Evangéliu secondu San Lucca conta chì una donna avìa una pèrdita di sangue da dòdeci anni, ch'ella avìa spesu tutti i so soldi indernu cù i médichi, è ch'ella fù guarita tuccandu u vestitu di Ghjesù. Più tardi, à u prucessu di Ghjesù, issa donna vense à testimunià davanti à Pilatu. Serebbe Santa Verònica.
Anu contu chì, à e Via Cruci, santa Veronica hà asciuvatu a faccia di Ghjesù cù un telu di linu, è chì u visu hè restatu stampatu nantu à u telu.
U so nome ùn era micca Veronica. Era Berenice. Per via di quella stampa, l'anu cugnumata Veronica da una spressione latina chì vole dì "a vera imagine".
In Francia contanu chì Veronica partì per Roma cù u maritu per fà vede quella pezza à l'imperatore Tiberiu. Da custì andonu in Gallia, è si stacconu per annunzià u Vangellu, ugnunu da parte soia. Veronica serebbi stata interrata in l'attuale Soulac (dipartimentu di a Gironde) è u maritu in l'attuale Rocamadour (dipartimentu di u Lot).
Etimolugia: da u grecu "phéré" (purtà) è "nikè" (vittoria).[1]
