Jusan V. Misolas | |
---|---|
Minundagan | Syudad nin Naga, Camarines Sur |
Kasibotan | Estudyante, parasurat |
Nasyunalidad | Filipino |
Lahì | Bikolano |
Alma mater | Ateneo de Naga na Unibersidad |
Genre | Rawitdawit |
Bantog na gibo | Rimpos literary folio |
Mga bantog na gawad | St. John the Evangelist Parish Service Award |
Si Jusan Villaflor Misolas sarong kagubay na Bikolanong parasurat gikan sa Syudad nin Naga. Nagtapos sya sa Ateneo de Naga na Unibersidad nin AB Literatura. Kan 11-12 nin Abril 2014, saiyang pinadalagan an inot na TALA Poetry Workshop.[1] Sya nagin bise presidente kan Parasurat Bikolnon.
Sya nagin tagapakarhay asin tagaambag sa An Tambobong nin Literaturang Bikolnon asin nagkapirang pangkolehiyong publikasyon siring kan Sural, Tilad, asin Rimpos.[2][3][4][5] Kabali man an saiyang rawitdawit sa Sagurong: 100 na Kontemporanyong Rawitdawit sa Manlain-lain na Tataramon Bikol (2011).[6][7]
Nag-adal sya sa Ateneo de Naga na Unibersidad nin AB Literatura kun sain nagin aktibong syang myembro kan Ateneo Literary Association (ALA). Nagin kaapil man sya kan Kabulig-Bikol asin kan organisasyon pangkultura na Sumaro Bikolnon kun sain sya nagin direktor kaini kan 2010-2011.[8]
Kan 2015, pinanginutan nya an paghimo kan polyetong panliteraturang Rimpos kan Ateneo de Naga na Unibersidad.[9] Kan 2016, ipigbungsod niya an duwang libro nin mga rawitdawit sa Better Living Through Xeroxography Naga na saiyang ipinalis sa tataramon na Bikol. An titulo kan mga ini iyo an Pagkakan Rawitdawit, Mga Piling Dakitaramon asin man an Tao Te Ching.
Siya nagin partisipante sa Juliana Arejola-Fajardo Workshop sa Pagsurat-Bikol asin Saringsing Writers Workshop kan 2012. Sarô man sya sa mga partisipante kan pinakainot na Saling-Panitik Bienvenido Lumbera Translation Seminar-Workshop na ginibo kan Pebrero 8-10, 2018 sa Unibersidad kan Pilipinas, Diliman, Syudad nin Quezon.[10][11]
Dati siyang myembro kan Parasurat Bikolnon kun sain siya saro sa nagin panelista sa Saringsing Writers Workshop poon 2013 sagkod 2018.[12] Saro man sya sa mga kritiko sa CBSUA Writers Workshop na ginibo sa Calabanga, Camarines Sur kan 2014.[13]
Sa ginibong Rimpos: art-literature Exhibition kan Salingoy Art Group, katampad kan mga obrang kurit ni Gracia A. Nieves an saiyang mga rawitdawit. An aktibidad ginibo sa Naga City Art Gallery sa Jesse M. Robredo Coliseum poon Mayo 4 sagkod 18, kan 2013. Nagpaluwas nin sarong libro na pinakarhay ni Eilyn Nidea laman an haralìpot na saysay dapit sa mga parakurit asin parasurat na kaayon sa aktibidad siring man an mga ladawan asin mga panurat na ipinahiling sa eksibit.[14][15]
| |||||
|
| |||||
|