Zement is a aunoaganisches, fein gmohlans Bindemittl fia Meata und Bedau, des hydraulisch wiakt. Waunst Wossa dazua laast, nocha kriagst an Zementleim, dea wos duach Hydratatiaun zan Zementstoa eahärt'. Da Zement is' wichtigste Bindemittl im Bauwesn; Nochtäu is da hoche CO2-Ausstoß bei da Produktiaun.
Scho de Röma haum den opus caementitium kaunt. In da Mittn vom 19. Joahhundat san de easchtn Zementweak' in Englaund entstaundn. Wäu da Zement de söwe Foabm wia da Koikstoa auf da Insl Portlaund ghobt hod, hod ma eahm ois Portlaund-Zement bezeichnat. Zeascht hod ma de Foamlinge in Schochtöfn, späda daun in Drehrohröfn braunt.
Es Rohmateriäu wiad im Togebau ohbaut, brochn, trickat, gmischt und gmoin, sodass' Rohmöh entsteht. Des wiad daun bei 1450 °C im Drehrohrofn zan Zementklinka braunt. Da Drehrohrofn is a großes Rohr, wo auf da oan Seitn des Materiäu eine kummt und auf da aundan des fertige wieda ausse, sodass de Aunlog ständig in Betrieb is. Nochm Ohkühn wiad da Klinka in Silos zwischnglogat und mit Gips und hydraulisch wiaksauman Stoffn wia Hittnsaund oda Fluagoschn in Kuglmühln fein zan Zement vamoihn, dea wos daun ois Sack- oda Silowoa vakaft wiad. Längare Logarung fiaht zua Festigkeitsvalustn (noch drei Maunodn: 10-20 %, noch sechs Maunodn: 20-30 %). Feichtigkeit fiaht zua Knollnbüüdung, is oiso gaunz schlecht.
Da Zement bsteht ausm Zementklinka, Zuamoihstoffn, Nebmbstaundtäun und Zementzuasätzn.
De Ausgaungsstoffe fian Zementklinka san Koik und Taun bzw. Meagl, des wiad im Drehrohrofn bei 1450 °C gsintat, dabei schmüüzt de Tauneadn und de Eisnoxide. Meagl is aa nix aundas wia Koik und Taun, de wos scho vo Natua aus mitanaund vamischt san. So entstehngan de chemischn Vabindungan (Klinkaphasn) Trikoiziumsilikat (Alit), Dikoiziumsilikat (Belit), Trikoiziumaluminat und Tetrakoiziumaluminatferrit, in geringan Auntäu aa Koiziumoxid (Freikoik) und Magnesiumoxid (Periklas).
De Zementhydratatiaun is a stoak exotherme Reaktiaun, des muasst bei voluminösn Bauweakn beochtn (z. B. Staumauan). Bei da Reaktiaun mim Wossa (Hydratation) büdn se Kalziumsilikathydrat-Fosan, kuaz CSH, de se mitanaund vafüüzn und so de Festigkeit bewiakn. Dane'm wiad Ca(OH)2 freigsetzt, des is alkalisch. De untaschiedlichn Klinkaphasn reagian untaschiedli schnöö. Aum schnööstn reagierts C3A zua Tetrakalziumaluminathydrat. Duachn Zuasotz vo kloanan Mengan Gips im Zementweak büdt se stottdessn Ettringit („Trisulfat“) bzw. späta draus Monosulfat. Da Zement bleibt so vaoawadboa.
De wichtigstn Klinkaphasn san:
Phasen vo da Hydratation:
De Reaktiaunsgleichungan lautn:
Beiträg vo de oanzlnan Klinkaphasn zua Festigkeit:
De Zuamoihstoffe wiakn bei da Festigkeitsentwicklung vom Zement mit, owa es san koane sööbstständign Bindemittl, sondan se brauchn Koikhydrat.
Bis zua fünf Massnprozent deafn fein zakloanate, aunoaganische minaralische Stoffe sei. Do hauns ois eine, wos iagndwo im Zementweak iwa bliem is, wia z. B. Rohmöh aus da Klinkaproduktiaun.
Fias Regln vom Eastorrn wiad ihm Zement im Weak a kloa wengl Koiziumsulfat (Gips, Anhydrit) zuage'm. Des deafst owa söwa nia mochn, Zement und Gips mitanaund mischn, wäu sunst kaunst das daune haun.
| Bezeichnung | Druckfestigkeit [N/mm²] | Kennfoabm | |||
|---|---|---|---|---|---|
| noch 2 Togn | noch 7 Togn | noch 28 Togn | Sackfoabm | Aufschriftfoabm | |
| 32,5 L | – | ≥ 12,0 | ≥ 32,5 und ≤ 52,5 | hööbraun | |
| 32,5 N | – | ≥ 16,0 | ≥ 32,5 und ≤ 52,5 | schwoaz | |
| 32,5 R | ≥ 10,0 | – | ≥ 32,5 und ≤ 52,5 | rod | |
| 42,5 L | – | ≥ 16,0 | ≥ 42,5 und ≤ 62,5 | grean | |
| 42,5 N | ≥ 10,0 | – | ≥ 42,5 und ≤ 62,5 | schwoaz | |
| 42,5 R | ≥ 20,0 | – | ≥ 42,5 und ≤ 62,5 | rod | |
| 52,5 L | ≥ 10,0 | – | ≥ 52,5 | rod | |
| 52,5 N | ≥ 20,0 | – | ≥ 52,5 | schwoaz | |
| 52,5 R | ≥ 30,0 | – | ≥ 52,5 | weiß | |
Noch da ÖNORM EN 197-1 gibt's fünf Hauptzementoatn:
De Zemente wean mit da Zementoat, dem Auntäu und da Oat vom Zuamoihstoff, da Festigkeitsklassn und da Aunfaungsfestigkeit bezeichnat.
Zan Beispüü waun aum Sackl fuigands draufsteht, wos hoaßt des?
CEM II A - L 42,5 R
CEM II is a Portlaundkompositzement, mim Auntäu A (des steht beim CEM II fia 6 - 20 M.-%) aun Koikstoa (mit an Auntäu vo oaganischm Kuinstoff vo unta 0,5 Massnprozent), oiso a Portlaundkoikstoazement. Des 42,5 is de Festigkeitsklassn, des hoaßt de Druckfestigkeit noch 28 Togn beträgt 42,5 N/mm² (= MPa); R steht fia Rapid, damit san ned de Hüttldoafa gmoant, sondan des is englisch fia schnöö, oiso hod a a hoche Aunfaungsfestigkeit.
Maunchmoi kauns sei, dassd an speziöön Zement brauchst, drum san in da ÖNORM EN 197, ÖNORM EN 14216 und ÖNORM B 3327 Sondazemente gregelt.
Commons: Zement – Sammlung vo Buidl, Videos und Audiodateien
