D Schiachn (dt. Hässlichkeit, engl. ugliness) is a Weatung iwa an Mensch, a Viech, an Zuastand oda a Soch, de wo mid an schlachtn Gfui vabundn is.
Baspuisweis ko a Mo schiach sei, a Froosch, s Weeda oda a Auto.
S Gengdoal vo da Schiachn is d Schee.
S Woat schiach kimmt vom Middlboarischn: schiech und is mid schei (dt. scheu, engl. shy = ondan ausn Weg geh, Kontakt vameidn), scheichn (vajaukn, davojogn), scheissli und schief vawandt.[1]
Entstondn is unsa Gspia fia Schee und Schiach duach en evolutionäan Voadoal ba da Partnawoi. Schiach is wos, wo net an gfuidn idealn Duachschnitt entspricht. Ba da Partnawoi ko des a Gfoar bedeitn: da Schiache (Schiefe, Scheie) hod an Gendefekt oda ea is kronk und schwoch - jednfois "Finga wegga" mid dem stimmt wos net. Da Gendefekt oda d Kronkad ko an d Kindln vaeabt wean oda Se oda Ea san net imstond fian Nochwux guad z soagn.
D Schiachn hod in bestimmtn Situationa aa a Attraktion. S Schiache ko intressant sei, wei ma jo neigiari san. Mia grusln uns ob und zua aa gonz gean: Vom Gruslfuim bis zua d boarischn Schiachperchtn.[2]