Ostan, Oustan oda Ostern is a traditionejs Fruajoarsfest, wo heidnische, jidische und kristliche Wuazn hod.
De Kristn feian de Afastehung vom Jesus und de Judn in Auszug aus Egyptn (Pessach-Fest). De heidnischn Ibaliefarunga beziagn si vor oim af a Fruajoars- und Fruchborkeitsbrauchdum. Deshoib is koa Zuafoi, dass Ostan am Sunda nochm easchtn Fruajoarsvoimond gfeiad wead.
Da Nama Ostan hod an oidgermanischn Uasprung und hengt mit da Himmesrichtung Ostn zamma, do wo de Sun afgeht. Vui andane Sprochn vawendn a Obleitung vom jidischn Pessach,: franzesisch Pâques, griachisch: πάσχα, islendisch: páskar, italienisch: Pasqua, hollendisch: pasen, portugiesisch: Páscoa, russisch' Пасха, ukrainisch: Великдень, schwedisch: påsk, spanisch: Pascua, tiarkisch: Paskalya.
De Kristn glaam, doss da Jesus voa rund 2000 Joar zan jidischn Pessach-Fest z Jerusalem am Kreiz hingricht worn is. Da Grund woar de Ongst voa Afrua und de Behaptung vom Jesus, doss a da Messias warad. Deshoib homs eam aa a Schuidl afs Kreiz ghengt, wo draf gstandn is, "Kini vo de Judn".[1] Da Dog an dem a kreizigt worn is, hoasst heit Koarfreida.
Am Sunda (heit: Ostasunda) draf, hom nacha Ohenga vom Jesus gseng, doss sei Grob laar wor.[2] Spoda is gsogt worn, doss da Jesus voa rund 500 Leit easchiena warad und voa eana predigt hed.[3] De Afeastehung hod de Leit davo ibazeigt, doss da Jesus da Suhn vom Heagod warad.[3] De Kristn glaam aa, doss daduach fia jedn Mensch Hoffnung af Eaneiarung in de Wejd keman is.[4]. Duach in Glaam in God[5] dadadns sprirituej lebendi wean und a neis Lem ofanga kina.[6]
In de Passionsspui wead s Load vom Jesus nochgspuit. De Obaammagaua Passionsspui san de wejdweit bekonntastn davo. De letztn fimf Dog im Lem vom Jesus wean do duach de Doafbewohna vo Obaammagau nochgstejt.
An Haffa Ostabrauchdum, wia Oafeabm, Oavastecka und Schokoostahosn, hod mit am Fruajoarsbrauchdum vo oidn eiropejischn Natuareligiona z doa.
Da Zammahang is zan Tei offnsichtli: Ostaoa und Ostahos (Fruchtborkeit), Ostafeia und Ostaradl (Sunnakult), Ostawossa (Jungbrunn, Eaneiarung, Fruchtboakeit), Ratschn und Ostaschiassn (Wintageista vatreibm), Ostabrod und Ostaspeisn (Opfa und Eaneiarung) und so weida.
A Ostaoa is traditionej a hoartkochts Henaoa, wo gfeabt, ogmoit oda vaziad und z Ostan vaschenkt wead. Heit wean woarscheinli meara Ostaoar aus Schoklad vaschenkt und gessn. Ostaoar wern oba aa zua Dekoration vawendt. Des kena ausblosane Henaoar sei oda Oar aus andan Stoffn wia Kunststoff, Pappadeckl, Stoa oda Gips.
Wo dea Brauch heakimpt is ned sicha. Es Oa is oba in de moastn Kuituan a Symboi fia Fruchtboakeid und neies Lebm.
Da Hos is aa a oids Symboi fia Fruchtboakeid (wei sa si so schnej vamean). Es dominante Symboi fia Ostan is da Ostahos eascht im 17. Joarhundat worn. Da genaue Grund is ned bekonnt. Da Fejdhos hod de Phantasie vo de Menschn oba scho imma befligld: Ea rennt blitzschnej davo und schlogt dabei Hokn, so ois ob a wos z vabeagn hed. De Mandal stengan afrecht wia a Mensch, wens ums Weibal kempfn. Und grod im Fruajoar siagt ma vui Hosn. Im boarischn Brauch bringt jednfois moast da Ostahos de Ostagschenk und vasteckts in Ostanestan, wo de Kinda nacha suacha miassn.
In vuin Gegandn schneidt ma am Greanpfinzda Poimkatzalzweig ob. De wean na dahoam in a Vasn gstejt und am Koarsamsda mit ausblosane und bunt ogmoide Oar gschmickt.
Ratschna san uaspringli a Weakzeig zan Vatreim vo Vegln vo de Fejda gwen, desweng sans aa a Symboi zan Vatreim vo de Wintageista worn.
In da katholischn Ibaliefarung fliang de Glockn am Greapfinzda af Rom und keman eascht z Ostan wieda. In dea Zeid ibanehma de Ratschna de Funktion.
Es Ostafeia wead moast am Koarsamsda, in da Ostanocht, obbrennd. Da Brauch stommt ois oidn Zeidn und is spoda vo de Kristn ibanumma worn. Es Feia is a Symboi fia de Sun, de wo im Fruajoar imma steaka wead. Feia hod aa a reinigende Wiakung und vatreibt de Wintageista. De Oschn is friaa af de Fejda vastraad worn, ums Woxdum z sichan.
Traditionej wead am Greapfinzda, Koarsamsda oda Ostasunda a Koab mit Ostaspeisn zua Speisnweih in d Mess mitgnumma. Moast san do drin Ostaschinkn (Gsejchts), Ostabrod (Weißbrod), Ostaoar, Soiz, Pfeffa, Gree, Paradeisa und Mehjspeisn. Am End vo da Mess wean de Speisn gsegnet und dahoam zan Ostafruastuck gessn.
Noch da langa Fostzeid hod ma si natiale bsundas aufs Fleisch gfreid. In Estreich hoasst ma de Speisnweih desweng aa oft Fleischweih.
Weihnochtskroas | Nigglodog • Heiligomd • Kristbaam • Rauhnocht • Wüde Jogd • Silvester • Neijoar ooblosn • Neijoar oosinga • Perchtn • Sternsinga • Goaßlschnoizn • Apaschnoizn |
Foschingszeid | Fosanocht • Narrischa Pfinzda • Ruaßiga Freida • Schmoiziga Samsda • Oschamigga • Fosanegl • Liachtmess |
Ostakroas | Ostan • Poimkatzal • Poimbuschn • Poimgart • Ostabrod • Oascheim • Poimsunda • Greapfinzda• Oustabrunn |
Joareskroas | Walburgisnochd • Maibaam • Pfingstox • Unruahnocht (Pfingstn) • Johanni • Oimotrieb • Wiesn • Ollaheilignomd (Halloween) •Ollaheilign • Ollasäin • Martini |
Gwand | Boarische Tracht • Diandl • Gamsboart • Haferlschuah • Lederhosn • Pfoad • Roagaspitz • Schariwari |
Lebmsobschnitt | Ged • Fensterln • Boarische Hozad • Prograda • Sterbbuidl |
Lebmsfreid | Derblecken • Gstanzl • Hiatamadl • Hoagascht • Schuahplattler • Schmei • Weana Schmäh • Wolpertinger • Unruahnocht |