Der Artikl is im Dialekt Obaboarisch gschriem worn. |
Donar oda Thor (nordgermanisch), "da Donnara", is oana vo de Haptgedda vo de Germanen. Fia de Seefohra wora da Gewitta- und Weddagod, fir de Bauern wora da Vegetationsgod. In da Edda is a da Beschitza vo Midgard, wo de Menschn wohna.
De Vorstellung vom hammaschwingenden, wognfohrenden Wetta-/Donnargod is an uroids Buid vo am God. Da hethitische Tarhunna oda da indische Indra wead beispuisweis praktisch identisch gschuidat. De Untaschiede san marginal: Da Wogn vom Donar wead vo Goassbeckn zogn, dea vom Indra vo foibn Pferdln. De Woffn vom Donar is a Wuafhamma, de vom Indra is a Wuafkein; beide kema oba nachm Wuaf wieda in de Hand vom God zrucke.
Donar is nochm Wodan da oberste und gfiachtetste vo de Getta. Ea is da Sohn vom Wodan und vo da Jörd (da Erdn), sei Gattin wor de scheene goidhoorige Sif, mit dea wo aa a Dochta, de Thrud (Kroft), ghobt hod.
In da Ragnarök kimmt da Donar durch de Midgardschlanga ums Lebm. Ea daschlogt de Schlanga zwoar mit seim Hamma, oba dasauft nacha im Gift, des wo des Urviech im Todeskampf ausspeibt.