![]() ulos | |
Soroh | Kain seni |
---|---|
Bahan | sutra miwah kapas |
Genah asal | Indonésia (Sumatra Kalér) |
Ulos inggih punika kain tradisional saking Batak, Sumatra Kalér, Indonésia. Makudang soroh ulos madué artos seremonial sané mabinayan. Ulos ketah kaanggén kasampirang ring bahu, ring upacara pawiwahan kaanggén antuk ngiket sang sané mawiwaha. Ulos sacara tradisional katenun nganggén tangan, ring pakaryan ulos punika ketah dados tetamian kulawarga, tur kaanggén ring acara-acara kautama, minakadi pitra yadnya, pawiwahan miwah upacara liyanan.
Krana pagentosan masa miwah modernisasi sampun ngaranayang akéh soroh motif ulos nénten kasenengin malih.[1]
Dados silih tunggil wagian pradaban kuna, sawatara 4000 warsa sané lintang, doh sadurung wangsa Éropané nguningin tékstil, ulos sampun dados wagian saking krama Batak. Maplarapan antuk kawéntenan tiga wit keangetan antuk manusa; Surya, Api miwah Ulos. Ipun dados wit kaangetan krana Ulos nyandingin kauripan ring pagunungan sané dingin. Indik palemahan punika sunaré nénten ja jangkep ngicain kaangetan kautama ritatkala wengi.
Nyansan suwé Ulos dados pahan krama Batak, dados pinaka cihna wénten upacara-upacara ageng, status sosial, miwah rasa asah asih asuh. Warna-warna dasar utama ipun sekadi warna tridatu selem, bang, petak.[2]
Nenun kain ulos punika dados sesana para pradana. Krama irika percuya pinaka prosés nenun sanget kekait antuk pradana ring ngemong kulawarga, rare, miwah krama, ntuk ngasilang asiki kain ulos, ketah nelasang galah ngasasih.
Kain ulos ketah nganggén benang kapas miwah kawarnain antuk lakaran ipun ring aab purwa nganggén pawarna entik-entikan. Warna pelung kaambil saking taru tangi, warna bang saking taru secang miwah tibah, warna kuning maasal saking kunyit, sapunik ireng kaasilang saking nyampuh tibah sareng indigo, taler ijo saking campuhan indigo dan kunyit. Palabuan (Paso) kaanggén antuk nyimpén toya pawarna, lakaran liyanan prsida saking kulit taru, padang, akah, endut miwah don-donan.[3]
Prosesné sané ten gelis tur unik ngardi kain ulos madué cecirén. Produksi kain ulos tradisional prasida kacunduk ring tigang désa punika Tongging, Paropo, miwah Silalahi ring pasisi kain Danu Toba. Sané mangkin pangardian ulos nyansan modérn, punika nganggén ATBM (piranti tenun ten mesin). Benang sané kaanggén nénten ja kakaryanin ngaraga, sapunika nganggén benang dadi. Tiosan punika, akéh para panenun langkung nyumpu nganggén pawarna sintétis antuk ngaryanin kain ulos antuk aji sané mudahan.[4]