![]() |
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
O viento ye o movimiento de l'aire que ye present en l'atmosfera, mas que mas en a troposfera, y que ye producito por causas naturals, por ixo gosa decir-se mas a sobén simplament aire. Se tracta d'un fenomeno meteorolochico.
A causa d'os vientos se troba en os movimientos de rotación y de translación terrestres que dan orichen, a la vegata, a diferencias considerables en a radiación solar u (insolación), mas que mas de onda luenga (infrarroya u termica), que ye absorbita de traza indirecta por l'atmosfera, d'alcuerdo con a propiedat diatermica de l'aire, seguntes a cual la radiación solar nomás calienta indirectament l'atmosfera ya que os rayos solars pueden travesar l'atmosfera sin de fer-la calentar. Son os rayos de calor (infrarroyos) reflectatos por a superficie terrestre y acuatica d'a Tierra los que sí logran fer calentar l'aire. A insolación ye cuasi a sola fuent de calor que puet dar orichen a lo movimiento de l'aire, ye decir, a los vientos. A la vegata, o desigual escalfamiento de l'aire da orichen a las diferencias de presión y ixas diferencias de presión dan orichen a los vientos.
O viento ye embrecau en o clima, en o ciclo hidrolochico trasportando as nubles y en fenomenos meteorolochicos con consecuencias erosivas u sedimentarias. Tamién ye a fuent d'a enerchía d'as ondas y corrients marinas.
Cuan se parla d'o viento como achent cheolochico ye como achent d'erosión, transporte y sedimentación de particlas.
O viento actua como achent erosivo en materials sueltos de mida arena, limo u archila cuan no son cubiertos de vechetación ni humidos, porque la vechetación proteche y a humidat los cohesiona y une. L'acción eolica se produce en arias deserticas, semideserticas, en costas y en zonas periglacials. Tamién puet actuar en atras zonas cuan por desforestación, sobrexplotación d'o suelo, por sequera u por as tres cosas o suelo ye ixuto y desprotechiu, como se desvinió en a decada de 1930 en Estaus Unius[1]
O viento ye un achent muito selectivo, y dependendo d'a enerchía que tienga podrá mover unas particlas u atras de diferents trazas: saltación u suspensión. A saltación afecta sobre tot a l'arena fina. A suspensión afecta sobre tot a lo limo, que se mantién en suspensión por as turbulencias de l'aire.
Dimpués de levar-se o viento as particlas finas (deflación eolica), quedan as particlas de mida gran, quedando una superficie pedregosa dita "desierto de piedras" u reg.
L'aire queda cargau con particlas y ye capaz d'esgarrapar os obstaclos que se troba por a on circula (abrasión eolica). Os tormos y penyas prenen forma de fongo porque l'aire ye mes cargau amán d'a superficie y s'erosionan mes por abaixo. Tamién se pueden formar puents naturals. Os catens, ruellos y cantals son esgarrapaus en o sentiu de l'aire y desembolican superficies planas y ariestas fendo-se ventifractos.
A sedimentación eolica ye tamién independient d'o clima, y se produce cuan l'aire ya no tien prou enerchía pa poder seguir transportando a suya carga sedimentaria. Os sedimentos eolicos pueden presentar-se como planas de limo, (lo loess), planas arenosas u diferents tipos de dunas. Os sedimentos eolicos pueden presentar superficies onduladas en diferents escalas, dende chicoz ripples dica dunas chigants.
As dunas presentan una mida y un movimiento bien observable a escala humana que fan que siga a forma d'acumulación eolica mes caracteristica y conoixita, pero no a sola forma sedimentaria y a mes important. A migración d'as dunas en a dirección d'o viento produce una laminación cruzata caracteristica bien observable. Pa que se formen dunas cal que no bi haiga vechetación. L'asociación de dunas fa que se formen os campos de dunas u ergs a escala macrocheografica.
En o "Libro del Trasoro" parlan d'os diferents vientos y en bels parrafos en dan nombres y en fan descripcions en o capítol 106 "Del ayre et de la pluuja e del viento et de las cosas que son en el ayre":
Tamién en a versión navarro-aragonesa d'as glosas del mestre Aleix de Barcelona del DE REGIMINE PRINCIPIUM de Chil de Roma dan nombres de vientos, pero a sobén omitindo a denomación en vernacla aragonés,[2] no conoixita por o traductor.
Dice vulterno a lo "vulturno" y auster a un viento d'o sud, coincidindo con a denominación d'o viento d'o sud actualment en rumano (Austru). Diz en nuestra lengua mediodía, pero de seguro traducindo dende o catalán mitjorn.