Dr Pio Ante Corradi (* 19. Mai 1940 im Kanton Basel-Landschaft^[1]; † 1. Jänner 2019^[2]) isch e Schwyzer Kameramann un Fotograf gsii.

Lääbe

Em Pio Corradi sy Großvater, e Staihauer us em italienische Mantua, isch uf Buckte uusgwanderet. Syni zwee Sihn hän s Böugschäft, d Corradi GmbH, wytergfiert. Dr Pio Corradi isch mit fimf Gschwischter ufgwachse. Sy Mathematiklehrer het em s Fotografiere vermittlet, bi me dreimonetige Kurufenthalt uf Tafaas het er erschti Aschpäkt vum Filme chänneglehrt.

Dr Pio Corradi isch zerscht zwai Johr lang uf d Chunschtgwärbschuel (hite: Hochschuel fir Gstaltig un Chunscht) z Basel gange un het derno Fotograf glehrt. Anne 1964 isch er uf Züri zoge un isch Kameraassischtänt vum Nicolas Gessner, em Georges Alexath, em Robert D. Garbade, em Grigori Wassiljewitsch Alexandrow un andere wore.

Ab 1972 het er as freie Kameramann gschafft un e Hufe nationali un internationali Spiil- un Dokumentarfilm gmacht, zem Byschpel Höhenfeuer (1985, Reschy: Fredi M. Murer), Candy Mountain (1987, Reschy: Robert Frank), Reise der Hoffnung (1990, Reschy: Xavier Koller), Donusa (1991, Reschy: Angeliki Antoniou), Das Wissen vom Heilen (1997, Reschy: Franz Reichle) oder Balkan Melodie (2012, Reschy: Stefan Schwietert). Derzue het er 2006 sälber Reschy in Poetry in motion – Pierre Favre gfiert.^[3]

Im Merz 2018 isch dr Corradi fir syni Kameraarbet am Dokumentarfilm Köhlernächte (Reschy: Robert Müller) mit em Schwyzer Filmbryys uuszaichnet wore.^[4] Aafangs 2019 isch er noch ere Chräbschranket^[5] im Alter vu 78 Johr gstorbe.

Filmografy

Biecher

• Dieter Bachmann, Pio Corradi, Urs Frey: Die Leute von Soglio. Zürich 2004. ISBN 978-3-907496-34-3

Uusstellige

• 2015: Chornhuusforum Bern: Fotografie^[6]

Uuszaichnige

• 1979: Qualitetsprämie vum EDI fir Guber – Arbeit im Stein
• 1982: Filmbryys vu dr Stadt Züri (Kamera)
• 1986: Qualitetsprämie vum EDI fir Höhenfeuer
• 1987: Filmbryys vu dr Stadt Züri für Der schöne Augenblick
• 1990: Qualitetsprämie vum EDI fir Tennessee Nights
• 1996: Kulturbryys vum Kanton Basel-Landschaft
• 2003: Retroschpäktiv an dr Soledurner Filmdäg – Spezialprogramm «Rencontre»
• 2016: Dytsche Kamerabryys – Ehre-Kamerabryys fir s Lääbeswärch
• 2018: Schwyzer Filmbryys – Beste Kamera fir Köhlernächte

Literatur

• Die Seele der Dinge. Neue Zürcher Zeitung, 31. Mai 2016
• Erwin Koch: Fänger des Augenblicks, in: Das Magazin, 26. Mai 2018

Weblink

• Pio Corradi in dr Internet Movie Database
• Pio Corradi bi filmportal.de
• Pio Corradi uf dr Websyte vu dr Swiss Cinematographer's Society

Fueßnote

1. ↑ S git zwoo verschideni Aagobe zum Geburtsort, z. B. Sikart schrybt Läufelfingen, Das Magazin schrybt Buckten.
2. ↑ Hans Jürg Zinsli. Er prägte das Bild der Schweiz. Tages-Anzeiger, 1. Jänner 2019.
3. ↑ Swiss Films: Pio Corradi
4. ↑ „Blue My Mind“ und „L’Opéra de Paris“ wurden in den Kategorien „Bester Spielfilm“ und „Bester Dokumentarfilm“ mit dem Schweizer Filmpreis 2018 geehrt. In: admin.ch. Archiviert vom Original am 3. Januar 2019; abgruefen am 3. Januar 2019. 
5. ↑ Erwin Koch: Fänger des Augenblicks, in: Das Magazin, 26. Mai 2018
6. ↑ Martin Bieri. Eine Würdigung des Beiläufigen. Der Bund, 5. Juli 2015.

Dä Artikel basiert uff ere fräie Übersetzig vu dere Version vum Artikel „Pio_Corradi“ vu de dütsche Wikipedia. E Liste vu de Autore un Versione isch do z finde.